Biebouw-resensie: Lotta se lewe deur Alice Pantermuller

  • 0

Titel: Lotta se lewe, bendes, swape en skape
Outeur: Alice Pantermuller
Uitgewer: NB-Uitgewers
ISBN: 9780798166737

Koop Lotta se lewe, bendes, swape en skape by Kalahari.com

Lotta se Lewe: Bendes, swape en skape is die tweede deel uit die Lotta se lewe-reeks. Die eerste boek is Lotta se Lewe: Konyne by dosyne en nommer drie is Lotta se Lewe: Wieg wurm wieg.

In hierdie aflewering besluit Lotta Liebenberg en haar beste maat, Chantelle, om ’n bende te vorm: Die Kwaai Konyne. Hulle vra vir Paul om ook ’n Kwaai Konyn te word. Hy het immers ’n boomhuis, en wat is ’n bende sonder geheime kwartiere? Iemand moet Die Glamour Girls alias die Skaapkoppe ’n les leer. Dan is daar nog Lotta se Indiese blokfluit wat vreemde dinge laat gebeur wanneer sy daarop speel.

Lotta se Lewe is die skepping van Alice Pantermuller. Sy bly op die platteland in Lüneburg, Noord-Duitsland en het dié reeks oorspronklik in Duits geskryf. Die pragtige Afrikaanse vertaling is deur Kobus Geldenhuys behartig. Al is die boek vertaal, transponeer dit goed na ’n Suid-Afrikaanse konteks. Lotta klink en lyk nes ’n regte Afrikaanse meisie.

Dié boek herinner mens nogal aan Roald Dahl se boeke, soos Charlie en die sjokoladefabriek (2006), Charlie en die Glashyser (2006), James en die reuseperske (2007) en Matilda (2006), wat deur ook Human en Rousseau in Afrikaans uitgegee is en deur Kobus Geldenhuys vertaal is. Ek vind dat sy vertalings na aan die oorspronklike teks bly en die fyn humor word behou. Hy hanteer kultuurverskille goed en laat Lotta eg Afrikaans klink.

Dit is die ideale boek vir seuns en meisies van ongeveer 8 jaar tot 12 jaar – alhoewel Martie Preller vroeër vanjaar, in ’n onderhoud met Izak de Vries, waarsku teen die streng groepering van boeke volgens spesifieke ouderdomme. Sy sien dit as iets wat vir kopers en bemarking gebruik word; vir haar is die inhoud en die voorkoms van ’n boek die belangrikste.

In die geval van Lotta se Lewe: Bendes, swape en skape is die stofomslag helderkleurig en besig. Dit lyk sommer van ver af interessant vir ’n kind. Dit is só geskryf dat selflees ’n plesier en prettig sal wees. Al die karakters word aan die leser bekendgestel deur ’n klein fotogalerytjie op die eerste twee bladsye. Die storie strek oor ’n week en is geskryf in die vorm van ’n dagboek – Lotta se dagboek. Die skriftipe, wat dit laat lyk asof dit met die hand geskryf is, is effektief en gepas. Dit skep die gevoel dat die leser eerder iemand se dagboek lees, veral omdat Lotta ook die verteller is. Daar is sketse tussenin die teks deur Daniela Kohl. Dit mag dalk vir die volwasse oog hinderlik wees, maar vir kinders, wie se leesvaardighede nog aan die ontwikkel is, is dit ideaal. Die sketse kan jonger lesers help wanneer hulle ’n bietjie sukkel met die betekenis van woorde. Dit maak Lotta se wêreld vir die leser baie meer konkreet. Die sketse dra ook by tot die aanbeveling en bepaling van die ouderdomsgroep. Kinders op hierdie ouderdom is baie visueel en maak van konkrete hulpmiddels gebruik om die betekenisse van nuwe woorde en begrippe te verstaan.

Jean Piaget, ’n Switserse ontwikkelingsielkundige, gebruik twee prosesse om die kognitiewe ontwikkeling van kinders te beskryf: assimilasie en akkommodasie.

In die assimilasieproses word inligting wat die kind reeds verstaan, gebruik om nuwe inligting te begryp. Die kind verstaan byvoorbeeld reeds dat die woord “kat” na ’n harerige, vierpotige dier met ’n lang stert verwys. Tog is ’n hond ook harig, het vier pote en ’n lang stert. Die verskil is dat ’n kat “miaau” en ’n hond “blaf”. Só kan ’n kind begryp dat daar ’n verskil is tussen ’n kat en ’n hond, omdat hy reeds geweet het wat ’n kat is.

Die akkommodasieproses vereis ’n totaal nuwe denkpatroon. Dit vind plaas wanneer ’n kind nog nooit met iets te doen gehad het nie. Dit is dan hier waar kognitiewe ontwikkeling plaasvind, omdat nuwe neuronverbande konneksies gemaak moet word om iets te verstaan of te begryp. Lotta se Lewe fasiliteer hierdie proses en bevorder ’n kind se leesvaardighede. Dit word bereik deur die interaktiewe leesstrategie, waar die sketse tot die verstaan van die teks bydra.

Laastens is dit vir kinders van hierdie ouderdom belangrik wat hul maats dink van die boeke wat hulle lees. Lotta se lewe: Bendes, swape en skape lyk soos ’n “grootmens”-boek en dit bou ook hul selfvertroue.

Hierdie boek is ideaal vir kinders wat nog leer lees, asook dié wat graag op hulle eie wil lees. Die storie is interessant en boeiend, want weens eenvoudige taalgebruik en sketse spreek dit tot die jonger leser.

Teken in op LitNet se gratis weeklikse nuusbrief. | Sign up for LitNet’s free weekly newsletter.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top