Litnet

Rita Swanepoel het in 2002 tot die akademie toegetree en is sedertdien verbonde aan die Vakgroep Kunsgeskiedenis aan die Noordwes-Universiteit se Potchefstroomkampus. Sy het haar PhD in 2011 in kunsfilosofie binne daardie vakgroep verwerf met 'n proefskrif getiteld “Die estetiese konkretisering van herinneringe in die konseptuele installasiekuns van Willem Boshoff”. Sy is die leier van die navorsingsnis aan die NWU met die tema Visuele narratiewe en kreatiewe uitsette deur interdissiplinêre en praktykgeleide navorsing / Visual narratives and creative outputs through interdisciplinary and practice-led research. Sy is tans een van die projekbestuurders van die derde projek binne hierdie navorsingsnis. Die titel van die projek is “Weerspieëlings en weerklank: gesprekke oor tipografie, topografie en tipologie / Reflective conversations: typography, topography and typology”. In die projek word kunstenaars – nasionaal en internasionaal – genooi om kreatiewe uitsette binne die tema te skep, waarop navorsers artikels skryf (dikwels saam met die betrokke kunstenaar) vir publikasie in 'n geakkrediteerde tydskrif. Artikels van haar het al in die South African Journal for Art History verskyn, asook in Literator, Image & Text, Guillotine en Woord en Daad. Sy is die programbestuurder van die MA in kunsgeskiedenis aan die NWU. Sy het al ses referate by nasionale konferensies en colloquia en twee internasionale referate gelewer. Sewe MA-studente het onder haar leiding hul studies voltooi, van wie vier met onderskeiding geslaag het.