Michelle Engelbrecht
Michelle Engelbrecht is ’n vroeëloopbaan-akademikus in Onderwysbestuur, Onderwysreg en Onderwysbeleid, met ’n fokus op skoolbestuur, regsverantwoordbaarheid en leierskap in Suid-Afrikaanse openbare skole. Haar werk ondersoek hoe regs- en beleidsraamwerke binne skole geïnterpreteer en toegepas word, veral waar daar ’n gaping tussen regsverwagtinge en alledaagse skoolpraktyk bestaan. Haar navorsing is gesetel op die kruispunt tussen onderwysreg en onderwysbestuur, met ’n besondere belangstelling in die rol van regskennis as deel van effektiewe skoolleierskap. Sy beskik oor ’n meestersgraad in Onderwysreg en is tans ’n PhD-student in Onderwysbestuur, Reg en Beleid aan die Universiteit van Pretoria. Deur haar werkservaring in sowel skool- as hoëronderwyskontekste bring sy ’n toegepaste perspektief na haar navorsing. Sy is betrokke by voorgraadse en nagraadse onderrig in modules soos Onderwysreg, Klaskamerbestuur, Skoolkultuur en Onderwysstelsels. Haar ontwikkelende navorsingsprofiel sluit publikasies en konferensiebydraes in onderwysreg en taalbeleid in, met ’n fokus op beleidsimplementering en billikheid in die onderwys.
Skoleseminaar: Alles begin by een doodgewone dag in die skoolhoof se kantoor
2026-07-22"’n Regsprobleem in ’n skool begin selde met ’n hofsaak. Dit begin eerder by die ontvangs. In die skoolhoof se kantoor. In ’n ouer se dringende e-pos. In ’n dissiplinêre gesprek. In ’n besluit oor toelating. In ’n foto wat op ’n skool se sosialemediaplatform gedeel word. In ’n veiligheidsvoorval op die speelgrond. Op daardie oomblikke wanneer die besluit geneem word, lyk dit nog soos gewone skoolbestuur op ’n doodgewone skooldag. Dit is juis waar die probleem lê."
Wanneer ’n taalreg soos ’n spesiale vergunning lyk: die broosheid van moedertaalonderrig in Suid-Afrika
2025-09-05"Met die Wysigingswet op Basiese Onderwyswette ... wat taalbeleide verder onder die beheer van die Departement van Basiese Onderwys sentraliseer, is die vraag: Gaan hierdie kwalifiserende bepalings nóg meer ruimte kry om moedertaalonderrig uit te hol?"