Litnet

T.J. (Johan) Scott het die grade BA (Regte) (1966), LLB (1968) en BA Hons (Latyn) (1971) aan die Universiteit van Pretoria behaal. Hy het in 1976 die graad Doctor Iuris aan die Rijksuniversiteit Leiden onder promotorskap van die wêreldberoemde regshistorikus Robert Feensta verwerf met ’n proefskrif getiteld “Die geskiedenis van die oorerflikheid van aksies op grond van onregmatige daad in die Suid-Afrikaanse reg”.

Scott was meer as 40 jaar verbonde aan die regsfakulteit van die Universiteit van Pretoria, te wete as lektor (1969), senior lektor (1970–1976), medeprofessor (1976) en professor (1976–2010) in die Departement Romeins-Hollandse Reg en Internasionale Privaatreg (die latere Departement Privaatreg). Hy was van 1984 tot 2006 hoof van die Departement Privaatreg. Hy het aan die einde van 2010 afgetree, maar tot aan die einde van 2015 in tydelike hoedanigheid as professor in privaatreg aangebly. Van 2016 tot 2017 was hy 'n besoekende navorser in die Departement Privaatreg aan die Universiteit van Suid-Afrika. In 2018 is hy in dieselfde departement as buitengewone hoogleraar aangestel.

Scott spits hom veral op die deliktereg, saaklike sekerheidsreg en internasionale privaatreg toe. Daarbenewens koester hy ’n besondere belangstelling in die regsgeskiedenis en regsvergelyking. Hy is die skrywer van talle vakwetenskaplike publikasies.

Van 1981 tot 1996 het hy as redakteur van die ensiklopediese werk The Law of South Africa gedien. In 1986 en 1994 het hy as genoot van die Alexander von Humboldt Stiftung in Keulen navorsing gedoen. Hy is getroud met Susan Scott, skrywer van onder andere die gesaghebbende Scott on Cession. Die egpaar het vier kinders.

Scott is ’n sportman en lief vir die buitelewe. Veral diepseehengel, draf, swem en snorkelduik lê hom na aan die hart. Verder verdiep hy hom in sy Africana-versameling. Sy geliefkoosde spreuk is die gevierde woorde van Cicero (De finibus 2.105): “Iucundi acti labores!” (Hoe genotvol is die rus tog na afloop van die arbeid!).