Francois Toerien
Francois verwerf sy BA (Hons)-graad in Teaterregie aan die Universiteit Stellenbosch in 1998.
Sedertdien het hy verskeie produksies vir die verhoog geregisseer en ontwerp, waaronder Weg (Ashanti Gold Smeltkroes-prys vir Beste Nuwe Teks), Eet alles (Ashanti Gold Smeltkroes-nominasie vir Beste Nuwe Teks), Jan en Jorie (Kanna-nominasie vir Beste Produksie en Beste Ontwerp), asook Heidi – die musiekblyspel (kykNET Fiësta-toekenning vir Beste Musiekgedrewe Produksie en Beste Ontwerp).
Hy is die skrywer van verskeie verhoogtekste, waaronder Hensop! (kykNET Fiësta-nominasie vir Beste Nuwe Teks), en het ook Marita van der Vyver se roman Die dinge van ’n kind (kykNET Fiësta-nominasie vir Beste Verwerking) en Herman Lategan se Hoerkind vir die verhoog verwerk. Hy is die skepper en skrywer van die televisie-sketskomediereeks Die Francois Toerien Show.
Hy was die aanbieder van verskeie televisieprogramme, insluitende drie reekse van Kniediep (1999–2001), die musiekprogram DKNT (2008–2011) en die regstreekse laatnag-komedieprogram VNL (2014–2015) vir kykNET.
Tans is hy ’n vryskutregisseur, skrywer, akteur, stemkunstenaar en lektor in dramastudies by die PNX Global Kollege vir die Uitvoerende Kunste.
Suidoosterfees 2025: Hortjies dig – ’n onderhoud met Francois Toerien
2025-04-08"[Dit is] in wese ’n liefdesverhaal, of dan nou ’n verhaal van twee mense wat aangewese is op mekaar. Een van die partye was ’n korrelkop, bitsig, begaafd, venynig, staatloos, te na gekom; die ander een was ondersteunend, alleen, sensitief, ’n klankbord, ’n kunstenaar, sy vrou. Beide vertel ons van onsself en van ’n lewe wat geleef is – hoe suksesvol, is vir die gehoor om te besluit. En dan is daar die ongelooflike poësie van Blum wat die produksie deurspek."
Toyota US Woordfees 2020: 'n onderhoud oor Die dinge van 'n kind
2020-02-17"Marita se vertelstyl (waaraan ek getrou gebly het in my verwerking) is spitsvondig en uiters onderhoudend, daarom dat so ’n wye verskeidenheid gehoorlede ook die verhoogweergawe sal geniet."