Litnet

Eleanor Cornelius het aan die Hoërskool Gimnasium in Potchefstroom gematrikuleer. Daarna het sy aan die destydse Randse Afrikaanse Universiteit, die Universiteit Stellenbosch en die Universiteit van Johannesburg studeer. Sy het meer as 20 jaar se werksondervinding in verskeie hoedanighede. Eleanor het onder andere as 'n taalpraktisyn by die Buro van die Woordeboek van die Afrikaanse Taal in Stellenbosch en die destydse Staatstaaldiens (nou die Nasionale Taaldiens) in Pretoria gewerk. Hierbenewens was sy ook 'n lektor in die Departement Afrikaans by die Universiteit van Fort Hare en 'n navorsingsassistent by Vista Universiteit in Port Elizabeth. Later was Eleanor verantwoordelik vir die vestiging van 11 leksikografie-eenhede vir elk van die amptelike tale, in die hoedanigheid van adjunk-direkteur: Taalontwikkeling by die Pan-Suid-Afrikaanse Taalraad (PanSAT). Toe sy die diens van PanSAT aan die einde van 2000 verlaat het, was al 11 eenhede as artikel 21-maatskappye geregistreer en volledig funksioneel.

Sy is sedert 2001 verbonde aan die Universiteit van Johannesburg, waar sy 'n senior lektor in die Departement Linguistiek is. Eleanor is onder andere verantwoordelik vir die aanbieding van modules in (psigo)linguistiek, teksredigering en (regs)vertaling op voor- en nagraadse vlak. Sy het reeds verskeie artikels in geakkrediteerde en niegeakkrediteerde vaktydskrifte gepubliseer en bied referate by nasionale en internasionale kongresse aan. Sy bied ook gereeld werkswinkels aan oor die gebruik van gewone taal en oor dokumentontwerp. Haar akademiese belangstellings sluit in tolking, regsvertaling, die snyvlak van taal en die reg, Afrikaanse regstaal en tekslinguistiek.

Eleanor is die ondervoorsitter van die Suid-Afrikaanse Vertalersinstituut (SAVI) en 'n SAVI-geakkrediteerde simultane tolk (Afrikaans-Engels/Engels-Afrikaans). Sy dien ook sedert Augustus 2014 in die raad van die Internasionale Federasie van Vertalers (FIT).