Litnet

Donovan Lawrence is ’n senior lektor in taalkunde en hoof van die Departement Afrikaans en Neerlandistiek aan die Universiteit van Wes-Kaapland.

Hy verwerf sy voorgraadse en nagraadse kwalifikasies aan die Universiteit van Wes-Kaapland en die Universiteit van Johannesburg. Dit sluit in ’n BA in 1986;,’n Hoër Onderwysdiploma in 1987, ’n honneursgraad in Afrikaans in 1993, ’n MA (cum laude) in 1998 en ’n PhD in 2004. In sy doktorale proefskrif ondersoek hy die gebruiksmoontlikhede van rekenaars vir die aanleer en onderrig van Afrikaans.

Sy erns met die onderrig van Afrikaans begin in 1998 as hoërskoolonderwyser, waarna hy aan die Onderwyskollege Söhnge in Worcester doseer. Hierna doseer hy aan verskeie universiteite, insluitend Unisa, die Universiteit van die Witwatersrand en die Universiteit van Johannesburg. In 2018 aanvaar hy ’n pos by die Universiteit van Wes-Kaapland, waar hy tans voorgraads en nagraads in sosiolinguistiek, pragmatiek, vertaalkunde en kontekstuele taalkunde doseer. Daarbenewens bied hy ook studieleiding aan nagraadse studente.   

Hy is Umalusi se nasionale, eksterne moderator vir Afrikaans Eerste Addisionele Taal (EAT) en Tweede Addisionele Taal (TAT) en verantwoordelik vir die gehalteversekering van matriekvraestelle.  

Tydens sy loopbaan dien hy in die direksies van onder andere die Virtuele Instituut vir Afrikaans (VivA) en die Afrikaanse Taalmuseum en -monument (ATM). Hy dien ook tans op die Afrikaanse Nasionale Taalliggaam van die Pan-Suid-Afrikaanse Taalraad (PanSAT).

Hy lewer gereeld referate by plaaslike en internasionale kongresse. Sy navorsing fokus veral op die gebruik van Afrikaans in digitale kontekste, en onlangse navorsing hieroor verskyn in die vorm van artikels in Tydskrif vir Geesteswetenskappe (“Afrikaansstudente se gebruik van emoji’s”) en LitNet Akademies (“Afrikaansstudente se gebruik van WhatsApp as leerplatform: ’n nuwe norm(aal)?”) en ’n hoofstukbydrae in Toegepaste taalkunde in Afrikaans (“Rekenaarondersteunde taalonderrig”).

Hy is ook ’n gereelde skrywer vir Media24 se taalrubriek wat in Beeld, Die Burger en Volksblad verskyn.