Litnet

Carl Rohwer is ’n oudstellenbosser, geïnspireer deur SRF Göldner, skaak, seil en Marguerite. Hy het nege gelukkige jare as Wiskundedosent (UZ) in Mtunzini gewoon, waar hy tennis geleer het en vliegopleiding en vier kinders gekry het. Daarna het hy as spesialisanalis in Noordhoek gewoon, en ook vrugbare navorsingsamewerking oor nodale latfunksies met medestudent en skaakvriend Johann de Villiers beleef. Hier het die LULU-teorie uit praktiese probleme ontstaan. Daarna, aangestel as hoofwetenskaplike by die Universiteit Stellenbosch (BMI), het hy besluit om ’n verdere paar jaar toegewyd by die Wiskundedepartement navorsing te doen en ook die ontluikende LULU-teorie verder te vestig. Dit het baie langer geduur as verwag. Gereelde uitnodigings na instellings soos Bell Labs, ETH, GSF, ensovoorts, ander uitstaande kollegas soos Laurie, Wild en Malkowsky en geselekteerde kontraknavorsing vir verskeie firmas het sterk geïnspireer.

’n Navorsingseminaar oor golfieteorie onder leiding van Charles Chui het nuwe rigtings aangedui. Op versoek het ’n monograaf oor die LULU-teorie (Springer 2005) sowel as ’n uitvoerige motiveringsartikel saam met Wild vir potensiële toepassing in beeldverwerking verskyn. Die natuurlike uitbreiding en analogie in funksionaal-analise is saam met Malkowsky en Anguelov gevestig. Met die waardevolle bydrae van Laurie is die vinnige weergawes van die Diskrete-Puls-Transforms oor die laaste paar jaar gevestig, en Anguelov het ongepubliseerde idees tot ’n teorie vir hoër dimensies gevoer.

Ná aftrede op 60, volgens destydse beleid, het hy ingestem tot ’n kontrak van twee jaar as professor in Wiskunde en dekaan by die International University in Germany te Bruchsal. Met sy terugkoms is die navorsing met nagraadse studente en kollegas hervat, asook ’n pos as navorsingsgenoot te Stellenbosch.

Jarelange stokperdjies soos tennis, ou Porsches en filosofie, sowel as die ontwerp, bou en vlieg van klein helikoptertjies en verskeie projekte in meganiese ingenieurswese saam met Gert Kriek word steeds beoefen. Wonderlike vriende en familie vul ’n ryk lewe.