ATKV-Postmatriek – "’n geleentheid vir jongmense om uit te sorteer wat hulle met hulle toekoms wil doen"

  • 0

ATKV-Postmatriek bied die ideale geleentheid vir jou wat 6 tot 7 weke beskikbaar het om jou CV te verbeter en emosioneel te groei. Remona Voges het met Lizette Odendaal oor die program gesels. 

Fotobron: Canva

Wat behels die ATKV-Postmatriek-program in ’n neutedop? 

ATKV-Postmatriek is ’n geleentheid vir jongmense om uit te sorteer wat hulle met hulle toekoms wil doen terwyl hulle aan ’n indrukwekkende CV werk, tonne blootstelling aan ’n wye verskeidenheid aktiwiteite en loopbaanrigtings kry, ’n gestruktureerde emosionele-intelligensie-program deurgaan en selfvertroue en lewensvaardighede opbou. Kortom – ’n jaar wat jou voorberei om kinderspeletjies te maak van die grootmenswêreld.

Wie sal aanklank by hierdie program vind? 

Enige 18–21-jarige jongmense wat nog onseker is oor die rigting wat hulle moet inslaan vir die toekoms, wat onseker oor hulleself is in die skielike grootmenswêreld, asook enigiemand wat wel seker is wat die toekoms inhou, maar net ’n breuk nodig het na 12 jaar se skool en iets anders wil doen voor die groot studies weer begin.

Hoekom is dit belangrik om veral in vandag se tye so ’n program te voltooi wat ’n mens help om te besluit wat jy regtig met jou lewe na matriek wil doen? 

Daar is ongelooflike druk op die jongmense vandag om al van ’n baie jong ouderdom af keuses te moet maak rondom hulle toekoms (loopbaangerigte vakke kies in gr 9 al), en met die huidige ekonomiese omstandighede in Suid-Afrika, asook die groot werkloosheidkoers en die prys van studie, is daar nie meer ’n geleentheid om kanse te vat en foute te maak en voor te begin nie – dit kos te veel geld, of die geleentheid wat nie benut word nie, word deur iemand ander opgeraap. Hierdie program streef nie net daarna om hulle te help met loopbaankeuses en loopbaansekerheid nie, maar ontwikkel jongmense op alle gebiede van hul menswees sodat hulle ook in staat is om al die uitdagings wat die grootmenswêreld inhou te hanteer en as studente of jong werkendes in die arbeidsmag te floreer.

Hoe is die inhoud van die verskillende kwartale opgedeel? 

Die program is saamgestel sodat daar in elke kwartaal ’n gedeelte akademie is, ’n gedeelte avontuur, vaardigheidsontwikkeling, daaglikse emosionele groei en begeleiding deur personeel, en baie blootstelling aan nuwe en vreemde goed wat nie net selfvertroue bevorder nie, maar elke student se wêreld ’n bietjie groter maak in die proses om alles wat binne en rondom hulle gebeur vanuit ’n ander, objektiewe oog te beoordeel ten einde beter, meer ingeligte besluite te kan neem.

Kies mens een kwartaal, of kan mens meer as een kwartaal se program bywoon? 

Voornemende studente kan kies of hulle wil inskryf vir die jaarprogram wat strek vanaf Februarie tot November, en of hulle slegs vir een of meer kwartale apart wil inskryf volgens die tyd beskikbaar of die behoefte soos per kwartaalinhoud. Die inhoud van die program en die verskillende kwartale is beskikbaar by www.atkvpostmatriek.co.za en hulle kan my enige tyd kontak by lizetteo@atkv.org.za of 082 416 7217 indien hulle meer wil weet of vir ons wil kom kuier op ATKV-Drakensville om te sien wat ons doen en ons huidige studente te ontmoet.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top