Foto: Canva
As gister so uitspoel
As al gister se gedagtes en klagtes uitspoel
op vanoggend se verlate strand
tel ons dit maar net op
gooi wat moet in die asblik
bêre wat kosbaar is in die skatkis
sodat ons môre mooi kan seil
as die winde reg is
as die ou klagtes weg is
want die lewe het sy liedjies
wat hy sing en ons laat dans
tot diep in die nuwe jaar
as gister se klagtes nie swaar dra
aan ons diepgesnyde wonde
wat so aanhoudend klop en klop
baie mense verstaan niks
niks van seer en weer gebeur nie
van nerf-af val oor jou eie bek nie
baie mense oordeel so maklik
tog sit ons hier met gister
toe die weer sleg was
toe ons verlore was
op die oop rowwe see
in ʼn baie klein bakkie
wat gelek het met een riem
so ons weet daar is ʼn God
ons het Hom gesien
verdien toe ons nie wou betaal nie
dan as gister so uitspoel glimlag ons maar net
want ons weet.