KKNK 2018: Plekspesifieke produksie neem voortou met ses Kanna-benoemings

  • 0

Die plekspesifieke produksie Ons is almal freaks hier het met die pas afgelope Klein Karoo Nasionale Kunstefees (KKNK) op Oudtshoorn die voortou geneem met ses benoemings vir Kanna-pryse.

Kort op sy hakke is die produksies SwerfgoedNêrens, Noord-Kaap, Hierdie lewe en Melk & Vleis, met vier benoemings elk.

Laasgenoemde twee produksies is benoem in die kategorie vir beste teateraanbieding, sowel as vir die Kanna vir beste regie, met Nicole Holm (Ons is almal freaks hier), Wolf Britz (Hierdie lewe) en Marthinus Basson (Melk & Vleis). Nêrens, Noord-Kaap is ook in dié twee kategorieë benoem, met Nico Scheepers as regisseur.

Ons is almal freaks hier, geskryf deur die Hertzog-pryswenner Ingrid Winterbach en wat handel oor Saartjie Baartman (hoewel sy nie by name genoem word nie), is ook benoem vir beste manlike byspeler (Albert Pretorius), beste aktrise (Lee-Ann van Rooi), beste vroulike byspeler (Kay Smith) en beste teaterontwerp (Holm en Birrie le Roux).

Die solovertoning Hierdie lewe, ’n verwerking deur Saartjie Botha van Karel Schoeman se gelyknamige roman as huldeblyk vir dié grootse Afrikaanse skrywer, ding ook mee vir die pryse vir beste aktrise (Antoinette Kellermann) en beste teaterontwerp (Britz). Britz het ’n derde benoeming gekry, ook vir teaterontwerp, vir die debuutproduksie Babbelagtig.

Die reeds bekroonde Melk & Vleis van die jong skrywer Marina Albertyn staan ook ’n kans in die kategorieë vir beste akteur (Neels van Jaarsveld) en beste aktrise (Illse Roos).

Die produksies wat sake uitspook vir beste debuutaanbieding is die prettige Babbelagtig (ook ’n aanspraakmaker vir beste kinderproduksie), die distopiese Swerfgoed (waarvoor Bauke Snyman ook benoem is vir beste teks) en die solostuk You Suck (en ander afgryslike waarhede). Die ander benoemdes vir beste teks kom uit die geledere van die gewilde Uitkampteater: Du Toit Albertze vir Die meermin-kompleks en Philip Rademeyer vir sy bydrae vir Doos/Box.

Die jongelinge wat die aandag getrek het vir beste opkomende kunstenaar is Albertze (Die meermin-kompleks), die Ensemble van Die Nuwe Republiek van die Nuwe Nuwe Suid-Afrika en Stephren Saayman vir sy Uitkampteater-produksie Brandmerk.

Die produksies wat vir die beste musiekaanbieding benoem is, getuig van die uiteenlopende musiekaanbod by die fees: Lepeltjie vol snare (met Hannes Coetzee, Kunste Onbeperk se ontvanger van 2018 se Kruispunt-prys, wat bekendheid verwerf het vir sy besondere styl om met ’n teelepeltjie kitaar te speel), Besselsen (met Gertjie Besselsen van Mr Cat & The Jackal-faam wat hom in die veld van eietydse kabaret begewe); en Afrika my verlange / Afrique mon désir (’n samesmelting van Suid-Afrikaanse en Afrika-musiek in Afrikaans, Frans en verskeie Afrika-tale).

Op die kunsfront tel onder die benoemings Dance and Carve with My Father van Johannes en Collen Maswanganyi. Dit is ’n gesamentlike uitstalling van ’n pa en seun: Johannes is vanjaar se KKNK-feeskunstenaar en Collen is vereer met die Kunste Onbeperk-prys vir ’n nuwe stem. Jürgen Dünhofen se uitstalling Re-Acclimate is ook benoem vir ’n Kanna vir die beste bydrae tot visuele kuns, terwyl Diek Grobler uitgesonder is vir sy animasie vir die produksie Afrika my verlange / Afrique mon désir.

Hugo Theart, waarnemende uitvoerende hoof van Kunste Onbeperk, het almal in die onderskeie kategorieë gelukgewens me hul benoemings, maar ook al die deelnemers aan KKNK-2018 bedank vir hul bydrae tot die kunste.

Hy sê dit is verblydend dat die afgelope twee Teksmarkte van Kunste Onbeperk ook ’n wesenlike bydrae maak tot die ontwikkeling van nuwe produksies. Dit sluit in Ons is almal freaks hier, Melk & VleisDie meermin-kompleks, Swerfgoed en Die dans van die watermeid (wat in twee kategorieë benoem is).

Mareli Stolp, sameroeper van die Kanna-paneel, sê die paneel se 2018-ervaring kan opgesom word in drie woorde: “Verbyster, verwonder en verkwik.” Die mense wat die moeilike taak gehad het om by die kortlys uit te kom, was Diane de Beer, Laetitia Pople, Thami Mbongo, Rafiek Mammon, Amelda Brand, Tracey Saunders, Aidan Erasmus en Retha Bornmann.

Volgende jaar se KKNK word van Donderdag, 21 Maart tot Woensdag, 27 Maart 2019 op Oudtshoorn aangebied.

Die volledige lys van benoemdes is:

Beste teateraanbieding

Hierdie lewe
Melk & Vleis
Nêrens, Noord-Kaap
Ons is almal freaks hier

Beste akteur

Mbulelo Grootboom – Gif/Poison/Ityhefu
De Klerk Oelofse – Nêrens, Noord-Kaap
Geon Nel – Nêrens, Noord-Kaap
Neels van Jaarsveld – Melk & Vleis

Beste byspeler: manlik

Ephraim Gordon – Die dans van die Watermeid
Albert Pretorius – Ons is almal freaks hier
Richard September – Swerfgoed

Beste aktrise

Antoinette Kellermann – Hierdie lewe
Illse Roos – Melk & Vleis
Lee-Ann van Rooi – Ons is almal freaks hier

Beste byspeler: vroulik

Nicole Holm – Swerfgoed
Gretchen Ramsden – Die dans van die Watermeid
Kay Smith – Ons is almal freaks hier

Beste opkomende kunstenaar

Du Toit Albertze – Die Meermin-kompleks
Ensemble – NRNNSA of Die Nuwe Republiek van die Nuwe Nuwe Suid-Afrika
Stephren Saayman – Brandmerk

Beste musiekproduksie

Afrika my verlange / Afrique mon Désir
Besselsen
Lepeltjie vol snare

Beste regie

Marhinus Basson – Melk & Vleis
Wolf Britz – Hierdie lewe
Nicole Holm – Ons is almal freaks hier
Nico Scheepers – Nêrens, Noord-Kaap

Beste debuutwerk

Babbelagtig
Swerfgoed
You Suck (en ander afgryslike waarhede)

Beste bydrae tot visuele kuns

Diek Grobler: Animasie: Afrika my verlange / Afrique mon Désirt
Jürgen Dünhofen: Re-Acclimate
Johannes en Collen Maswanganyi: Dance and carve with my fater

Paneelprys vir die beste teaterontwerp

Wolf Britz – Babbelagtig
Wolf Britz – Hierdie lewe
Nicole Holm en Birrie le Roux – Ons is almal freaks hier

Kanna vir uitkampteater

Die Meermin-kompleks
Doos/Box
Lolly

Beste teks

Du Toit Albertze – Die Meermin-kompleks
Phillip Rademeyer – Doos/Box
Bauke Snyman – Swerfgoed

Beste kinderteateraanbieding

Babbelagtig
In die Lug
In die See

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top