Vrouedag-skryfkompetisie: ter wille van

  • 9

ek onthou die huis met sy duiwelsdak
die spens was ’n bedekte seën,
jou heelwordplek, jou asemskepplek, jou wegkruipplek

jy’t ons laat glo dat grootmense  soms tok-tokkie speel
(éintlik het die ooms vir skuld aan ons deure geklop)

ter wille van ons
het jy telkemale ons tassies gepak
buurvrou aan die ander kant, reg om ons te vang
(jy’t altyd gemaak of ons wegkruipertjie speel)

bang het bollemakiesie oor jou gesig geslaan
(die Thunderbird se dreuning kon jy van ver af hoor)
holderstebolder terughardloop, tasse agter die deur 

jy het gewéét, more sou jy weer die donkerbril dra
(pers was nog altyd vir my die lelikste kleur
omdat ek nie kan onthou om te vergeet)

eendag, sommersó
het jy die baksteenhuis vir die laaste keer gegroet,
die pokerface masker en ’n handvol sout agter jou gegooi

ter wille van ons, ek glo óók ter wille van jouself

  • 9

Kommentaar

  • Diep seerkry woorde, kort saamgevat en goed opgesom maar wat n duisend emosies, herhinneringe en verhale vertel. Wow! Well done Melody, dankie dat jy met jou woorde, ons elkeen se verhaal kan vertel.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top