Foto: Canva
Vlugteling
#Vrouens met gebalde vuiste
Niemand sien die vrouens nie
Hulle stap die strate met gebalde vuiste
Hulle kinders weet hulle loop so
Hulle kinders vra: Bring ons ma’s, ons oumas terug
Want ons het hulle vuiste nodig
#Ons is almal kwaad
Jy sien dit in ons vuiste wat fok fok fok
die hele tyd sê
#In die straat praat niemand nie
Jy kan in die straat praat oor ramaphosa of trump of die councillor of die
vreemdelinge
Jy wil
Jy probeer
Maar liewer nie
Want netnou hoor die klipgooiers jou
En dink jy vertel die wêreld
dat jy gesien het hoe hulle klippe
Mense doodgemaak het
vir hulle selfone
#Engele in Gugulethu-karre
Dis OK huurkarbestuurder
Of jy van die VSA of Gauteng kom
Google Maps vat jou op die township-hoofpad lughawe toe
Jy sal dit nie vooraf weet nie,
Maar wanneer jou passasier se kop vorentoe lê
Net nadat die klip haar getref het
En die hand die selfoon uit haar bewustelose hand gegryp het
Weet jy
Om vorentoe te kyk vir die karre –
een na die ander
het Engele in wat jou tot by die hospitaalhek vat
en dit vir jou oopmaak
#Ons gee die iPhone 14 vir mekaar
My broer langs my praat met sy voorouer-stem;
dalk sy oupa? Dalk sy ouma? Dalk al sy voorsate in een:
Fok seun – jy het die klip te hoog deur die venster gegooi
Jy wil net die iPhone vat
Jy wil nie die kar steel nie
Maar nou is die vrou dood
Sy is die een wat haar lewe geleef het
vir skole, vir onderwysers, vir kinders in nege provinsies van die land
Sy is die een met die PhD oor authentic caring
Sy is die ouma van tien
Sy is die een wat nou dood is oor jy jou klip te hoog gegooi het
hardloop maar
ons gee die gemoorde iPhone 14 vir mekaar
#vraagtekengesigte
Ons loop almal werk toe
Ek gaan skoolhou
Ek gaan kliniek toe
Ek gaan babas oppas
Ek gaan my brood verdien
Ons staan gevries
Ons sien jou menseroof, jong man
En dit los vraagtekens
op elkeen van onse gesigte