Litnet

Hallo Thys, dit gaan oor jou opmerking van 14 deser onderaan my brief van 13 deser oor ontleder se persoonlikheidstipes.

Ek kan sien dat, as daar oneindige heelalle is maar terselfdertyd is daar 'n eindige aantal moontlike boustene – molekulêre strukture soos elemente, molekules, chemiese verbindings, knipmesse, koppies en pierings, brandweerwaens, olietenkskepe, olifante, arende, muskiete, erdwurms ens – dat daar identiese konfigurasies, momentaan, iewers in die algeheelal (wat uit 'n oneindige heelalle bestaan) kan gebeur.

Ek sê 'momentaan' en gebruik die woord 'gebeur' want enige konfigurasie verander nanosekondes na hy tot stand gekom het. Die boustene is nog dieselfde maar daar is geen manier om die dinamika tussen, sê 'n Boeing 40 000 voet bokant Timbuktu en 'n erdwurm in jou agtertuin, te kwantifiseer nie. 'n Parallelisme (nog nie in die woordeboek nie) is nie 'n statiese rangskikking nie, dis 'n kinetiese gewoel met weliswaar 'n eindige aantal onderdele maar oneindige aksies tussen die onderdele. En nie noodwendig opeenvolgende aksies nie; die smaak van die bier wat ek nou sluk is beïnvloed deur die spreekwoordelike klap van 'n vlinder se vlerk in die oertyd.

Vir dus 'n parallelle heelal om te bestaan ... ag, laat staan heelal, selfs aarde of dorp; vir 'n parallelle huisgesin om te bestaan, moet die hele dinamika van die geskiedenis dieselfde wees; daar moes 'n Van Gogh gewees het en hy moes presies dieselfde skilderye gemaak het (want in die een dogter se kamer hang 'n afdruk van sy selfportret), Napoleon moes verloor het, Vesuvius moes op dieselfde oomblik gespuit het en die dinosourusse moes presies soveel jare vantevore uitgewis geword het ens ens.

Dis hier waar die voorstanders van 'n parallelle heelal se storie vir my in duie stort. Hulle sê byvoorbeeld in die parallelle storie kon, sê Hitler, die oorlog gewen het. Maar dit kan dan gebeur het dat in 'n parallelle wêreld die Romeine die Germane uitgeroei het en Hitler was dan nooit gebore nie! Buitendien, 'n ou lyk soos hy lyk omdat sy ouers lyk soos hulle lyk so vir jou om in 'n parallelle heelal te bestaan moes jou pa jou ma in in daardie heelal op dieselfde tyd getrou het. Al die alternatiewe besluite ten spyt moes jou ma en haar voorgeslag, en jou pa en al sý voorouers presies dieselfde geskiedenis gehad het as hulle eweknieë hier op aarde. Hoe vereenselwig die wetenskaplikes wat hieraan glo dit met die feit dat daar alternatiewe geskiedenisse kan wees?

Hierdie anomalie systap hulle deur te sê met elke besluit gaan die alternatief in 'n ander heelal voort. So vir elke besluit – en daar is miljoene besluite oor die aarde op enige gegewe oomblik deur mans, vrouens, kinders, reuns, tewe, ramme, bulle, koeie, ooie en selfs insekte – gaan die twee of drie of 17 alternatiewes voort in 'n ander parallelle heelal, en net 'n oomblik daarna gebeur dit weer, en weer, en dieselfde gebeur in in al die heelalle waarin hierdie alternatiewe geskiedenisse begin.

Maar bo- en behalwe dit nou alles: Gestel die aarde bestaan uit 10^x molekules. Aangesien oneindigheid aan die orde van die dag is moet daar dan ook 'n soortgelyke aarde iewers bestaan met daardie hoeveelheid molekules plus een, en ook 'n aarde met daardie hoeveelheid molekules minus een enkele een, of minus twee, of plus 10^y. Hoe lyk daardie 'aardes'?

Nee wat Thys, die hele storie is vir my absurd en daar is 'n paar verklarings oor hoekom: Een daarvan is dat ek nie verstaan wat hulle bedoel met 'n parallelle heelal nie en uit hoofde van my gebrek aan kennis en/of verstand die absurde gevolgtrekkings hierbo maak. 'n Ander verklaring is dat dit nie goed verduidelik is nè, ek kan dit dalk met 'n bietjie inspanning verstaan as hulle ordentlik verduidelik wat hulle bedoel. Dan, natuurlik, is daar die moontlikheid dat dit wel 'n klomp onsin is.

Groetnis

Jan Rap