Litnet

Thomas, jou briefopskrif van 25 deser lui "Die evolusieteorie weer eens bevestig". Klink vir my na ’n soort van ’n weerspreking. Indien ’n teorie bevestig word, word dit ’n wet. Ek sou reken Galileo het sekere teorieë oor swaartekrag gehad (dink aan sy demonstrasie met die twee koeëls wat hy van die skewe toring in Pisa laat val het) maar die wet van swaartekrag het gestalte gekry toe bewys is dat swaartekragversnelling 9,8 meter per sekondekwadraat is.

Nog ’n ding: As enigeen ’n (waarskynlike) gemis uitwys in die evolusieteorie is die alternatief nie dat hy glo die aarde is plat, 6 000 jaar oud en in 7 dae geskep nie. Die teorie het ernstige gapings, tot so’n mate dat ek dink die klakkelose aanvaarding van die teorie maak meer staat op geloof as enige van die religieë op aarde. Daar is egter geen twyfel dat evolusie wel plaasgevind het, en besig is om plaas te vind nie.

Daar kan wel aangevoer word dat ouens soos ek wat nie die hele storie sluk nie bloot te dom is om dit te verstaan. Dit mag wel so wees, maar dan moet daar tog die ouens soos julle wees wat met geduld en volharding vir ons kan wys waar ons verkeerd gaan en dit gebeur nie. Soos George Claassen sê, gee die bewyse. ’n Fossiel van etlike miljard jaar oud verklaar nie, sê, metamorfose, of parasietisme nie.

Miskien weet ek nie mooi wat die teorie behels nie, miskien moet jy die teorie stel sodat ek dit kan lees en daaroor peins. Die wet van Archimedes is ’n paar woorde, so ook die van Boyle en nog ’n klomp ouens wat jy in enige wetenskaphandboek kry. Hierdie wette kan ’n ou lees en die bewyse maklik verstaan. Hoe lui die teorie van evolusie?

Groetnis

Jan Rap