Litnet

Dagsê Thomas

Ek reageer op jou uitnodiging van gister om evolusie te gesels. Laat ek dit net duidelik stel dat jou niks wil laat aanneem of afsweer nie; ek speel net bietjie duiwelsadvokaat, ’skuus, a-pastafariese advokaat vanuit jou oogpunt; dalk kan jy lig werp op ’n paar goed wat erg raaiselagtig is vir my (ek self hang nie die teorie in sy geheel aan nie, dus verwerp ek ook nie die teorie in sy geheel nie).

Eerstens, na aanleiding van daardie verduideliking wat Angus van Darwin aangehaal het, jy weet, daardie ding van voorouers wat ’n gemeenskaplike voorouer het en die tesame met die gemeenskaplike voorouers van ander goed het weer ’n gemeenskaplike voorouer totdat ons uiteindelik by seker die heel eenvoudigste organisme uitkom naamlik ’n eensellige dierasietjie, ons almal se ooroergrootjie.

Wat het hierdie oersel geëet? Daar is niks op aarde wat nie ander lewe verorber of op ander lewe teer nie, so wat het hierdie dingetjie sy lewensenergie verskaf? As dit die son en die oersop is waaruit hy sou ontstaan het, was hy mos klaar bo-aan die voedselketting en daar was geen kompetisie nie, so waarom die moeite doen om te gaan staan en evoleer? Oorlewing van die mees geskikte bestaan juis (hoofsaaklik) daarin om jou kompetisie te uitoorlê en bokant hulle op die voedselketting te eindig.

Die volgende ding is parasiete. Die ’besigheidsplan’, kan jy maar sê, van ’n organisme om verskillende lewensfases in verskillende spesies te spandeer moet oneindig ingewikkelder wees as dié van ’n organisme wat, sê gras, eet. So hoekom daardie moeite doen? Evolusie is veronderstel om lukraak te gebeur (random mutation soos die aanhangers sê), so ’besigheidsplan’ hier is maar ’n soort van ’n metafoor vir die mog-het-treffe-proses wat oor millenia plaasvind. Terloops, hierdie tydsverloop is ’n probleem in sigself; as iets rêrig ingewikkeld is sê die aanhangers dit het 10 miljoen jaar geneem om te ontwikkel en as dit nog steeds onwaarskynlik klink sê hulle oukei, dit het 20 miljoen jaar gevat.

Beskou die rysmierspesies waarvan die soldate spuiters, in plaas van kake, het. Van hulle het gifstowwe ontwikkel wat die mens nie eers kan namaak in sy laboratoriums nie. Waarom het hulle hierdie weg gevolg? As dit ’n meer geskikte pas is as dié wat nog kake het, hoekom is daar dan nog hoegenaamd diesulkes?

Dan is daar die oogpister wat ek al voorheen genoem het. Die aanhangers sê hy het hierdie kokende sopspuitmetode as verdedigingsmeganisme ontwikkel omdat sy vlerke stadig oopvou. Sou ’n goedkoper opsie nie maar gewees het om vlerke te ontwikkel wat vinnig oopvou nie? Of het evolusie niks met ekonomie,die weg van die minste weerstand, en dus ook die tweede wet van die termodinamika, te doen nie?

Dink ook aan die pou wat die grootste en skouspelagtigste stert vir hom ’n wyfie besorg en nie ’n geveg soos met ander christelik-nasionale diere die geval is nie. Hoe strook dit met die idee van die sterkste oorleef? Dan is daar die mier wat, as hy jou byt, voel dit soos ’n hamerslag en jy’t vir 24 uur ’n vreeslike hoofpyn. Hoekom; die ding bly in boomtoppe waar g’n mens ooit kom nie. Wat van metamorfose; hoe lyk die halfpadmerk? Dan is daar nog taal; hoekom het die ape, waarvan die DNA so min van die mens verskil, geen taal nie?

’n Klomp raaisels, en hulle is nie te verklaar deur toe te gooi met tydsverloop, of oorlewing van die mees geskikte nie.

Groetnis

Jan Rap