Toerusting vir my kind
Ek breek jou gisters soos droë hout af
En gee jou ’n sleutel van glas
Wat pas op jou nuwe lewenskas
Dit bewaar jou uitrusting vir môre en elke ander dag
Daar is geen tiara of kroon
Met goud of diamant
Maar wel een van wysheid en verstand
Dra dit met opregtheid en goeie vertoon
Geloof en God se liefde
Is daar vir ’n lig op jou pad
En om liefde en geluk met jou saam te vat
Is daar vir jou hart ’n abbasak
Vir jou hande ’n handskoen of twee
Vir vasvat en saamtrek,
Saamvat en bymekaartrek
En ’n hand vol liefde om weg te gee
Skoene vir jou voete dié is daar vele
Tekkies vir die ongenaakbare harde pad
En al die dorings wat buite nog wag
’n Paar sagte skoene vir innerlike vrede
Bedagsaamheid, vreugde, eerlikheid
Is styf teen mekaar ingepak
Langs dit deugsaamheid en insig
En jou lemoenduifielag
Dit is waarmee ek jou toerus
Gebruik dit alles goed my kind
En jy sal jou pad na jou Verlosser vind
 |
 |
 |