Toe kind was nog in was

  • 0

Foto: Canva.com

Toe kindwees nog in was …

Ek het nog altyd geskryf soos wat ek praat. 
Plat, eenvoudig en carefree. 
Na al die jare is ek steeds dieselfde. 
’n Kind.

My hart verlang na die dae 
toe ’n Barbie al was wat ek wou hê. 
Die dae 
toe ons grootste vrees mondeling was.

Ek onthou die dae 
toe ons paddavissies in die vlei gevang het, 
die dae 
toe ons in die veld agter die huise rondgehardloop het, 
op soek na veldblomme en sprinkane.

Ek onthou die dae 
toe ons boomgeklim het 
en ons nerwe af geval het, 
die dae 
toe ons nog wegkruipertjie gespeel het.

Ek onthou die dae 
toe ons tol gegooi het, 
loeshokkie gespeel het 
en albaster geskiet het 
dat die grond onder ons naels vassit.

Ek onthou die dae 
toe ons saans toktokkie gespeel het. 
Ek onthou die dae 
toe al die padkinders byeengekom het 
om krieket te speel. 
Die dae 
toe dit nog oukei was 
om alleen by die huiswinkeltjie ’n brood te gaan koop.

Ek onthou die dae 
toe my ma ons saans moes roep om huis toe te kom 
voor die skemer val. 
Ek onthou die dae 
toe my pa ons biblioteek toe geneem het 
om boeke te gaan uitneem.

Ek onthou die dae 
toe almal nog Egoli gekyk het op M-Net Open Time. 
Die dae 
toe dit nog kwaai was om fiets te ry om die blok, 
toe ons nog tou gespring het, 
toe ons nog wol gebind het om skipping te speel, 
toe ons nog klap-ska-loe-loe gespeel het.

Ek onthou die dae 
toe tienerswangerskap nog ’n skande was 
en die woord respek nog betekenis gehad het. 
Die dae 
toe DStv, WhatsApp, Facebook en Twitter nog onbekend was. 
Die dae 
toe Hemelvaart nog ’n publieke vakansiedag was. 
Die dae 
toe ons blomme in ons hare gesit het 
om die begin van lente te verwelkom.

O, hoe het die tye verander.

Dinge was destyds soos my taal. 
Plat, eenvoudig en carefree. 
Hoe anders is dinge tog nou …

Soms, 
net soms, 
verlang ek na die dae toe kind was nog in was.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top