Foto deur Stefan Schweihofer van Pixabay
tjie tjie tjie
my gedig is ’n klein klein voël.
mooi soos ’n pou
’n woordpou,
wat ek sien deur die skrefies
van my rasige gedagtes.
ek weet,
as ek jou sou laat loer
sien jy ’n hongerblou hoender
kaalgat en verbouereerd
met puisies waar die vere moet wees.
kom sit
laat ek aan tafel goël
met pampoenkoekies en verjaarsdagkersies,
my gedig is ’n klein, klein voël
wat eerder vlieg,
ontsnap
as om op ’n bord
gekrummel of geairfry
kitskos te word.
16 September 2026
Kommentaar
Kruitjie roer my nie
Oor die kuiltjie op jou wang
Tjie tjie
Kroontjie oor my hart
Toontjie van smart
Tjie tjie
Oor die leemte wat
Jy leeg agterlaat
Tjie tjie
Maar jou woorde sal ons hou
En veraltyd herkou
Tjie tjie
En soos 'n pou se veer
In my woordhoed stoffeer
Ilanadevlakte
16 September 2026