Foto: Canva.com
Suid-Afrika
Suid-Afrika – ek het hoog bo vlaktes oor jou gesweef
Oor berge en riviere en oseane
Stede vol rook en roet
Berge met pieke vol sneeu
Landerye, skilferdroog
Boere wat huil langs bankbestuurders
Hawens met groot skepe en dik toeriste
Ek het die plekke gesien waar mans doelloos sit en wag vir werk
Maer kinders by verkeersligte
Meswonde, geweerskote, hospitale, ambulanse, motorongelukke
Kinderlyke en vroue wat soos lappoppe verkrag word
Sopkombuise met lang rye
Strate en stegies vol kots en urine
Skole onder bome en dooies in oorvol long drops
Ek het die vetblink pense en blinkswart motors van leiers gesien
Hul minagtende blik op ’n vernietigde land
Waar hulle agter hoë mure sit met KFC en Nando’s
Die reuk van olierige vleis druppend met drillerige welvaart
Riviere vol bloed stroom deur die strate
Ek het die reuk van die krematorium gekry
Jy is ’n ou man in ’n donker kamer
Waarvan die organe een ná die ander ingee
Die ontlasting stroom by jou uit en vlek die lakens
Jy stink en groen brommers sit reeds en zoem om jou oop mond
Land van armoede en dood
Ek draai my rug op jou soos iemand wat weet
Jy is vol aansteeklike siektes
Jou doodsroggel is vir my leersaam, selfs mooi, soos
Swane wat vir die laaste keer sing
Kommentaar
Dit is nou wat ek 'n gedig noem, Herman! Meesleurend en met 'n kragtige slot.
Dankie meneer - waardeer dit baie.
Vintage Herman Lategan. Droewelik waar, ritmies ontgogelend strompelend stotterend en helaas ... 'n beeldskone lem; geslyp vir die laaste avondmaal.
Beste Herman, koop vir jou 'n rugsak, tent en 'n slaapsak, en gaan op 'n staptoer hier in die Drakensberge. Na so 'n maand se gestappery skryf jy weer vir ons 'n gedig.
Groetnis
Angus, dit klink na 'n plan. Maar wie gaan my salaris vir daardie maand betaal? Dit klink wel na iets waarvoor ek kan spaar en oor skryf. Mooi bly.
Dankie Lien.
An accurate observation of the dystopian landscape in which we find ourselves.
Herman, dis ’n sterk gedig, treffend. Met, soos Daniël Hugo sê, ’n kragtige slot. Dankie daarvoor.
This is powerful and disturbing.
Hartverskeurend droef; ontnugterend mooi oor die eenvoud. Sjoe, eina. Dié bitterheid sny soos ’n lem deur ons almal. Behalwe in diegene in die groot swart motors met blou ligte. Afrikaans sing seer ...