2012 is die jaar van die draak, daardie nimlike dierasies wat in sprokies en op sekere eilande in Indonesië rondhang.
LitNet nooi jou om ’n kort sprokie (maksimum 500 woorde) te skryf waarin ’n draak voorkom. Dit kan ’n wrede draak, ’n slapende draak, ’n goeie draak of ’n dooie draak wees. Jou draak kan naamloos wees of Diederick heet, en mensvleis, marshmallows of brokkoli eet. Jou sprokie kan elemente van die waarheid bevat, vreeslik opgemaak, vreeslik ernstig, of 100 persent draakstekery wees.
Die spinner van ons gunsteling-draak-sprokie wen ’n eksemplaar van Die mooiste sprokies van Grimm (’n keur deur Marita van der Vyver, met illustrasies deur Piet Grobler), met komplimente van NB Uitgewers.
Stuur jou sprokie aan netfiksie@litnet.co.za; of as jy ’n geregistreerde gebruiker is, kan jy dit sommer direk op LitNet laai, onder die kategorie Fiksie-kompetisies. Onthou om jou naam en kontakbesonderhede by jou e-pos in te sluit. Die kompetisie sluit op 17 Februarie.
Kommentaar
Hi. Ek wil net graag weet wanneer word die wenners aangekondig?
Lekker dag!
Haai Ockert
Dankie vir die terugvoer!
Sterkte aan almal! Julle almal skryf baie beter as ek 🙂
Hi
Is die wenner reeds aangekondig? Waar kan ons sien wie dit is?
Hallo Elmari, die wenner van die kompetisie is bekend: https://www.litnet.co.za/Article/skryf-n-draak-sprokie-en-wen, groete, Naomi Meyer LitNet: Inhoudsbestuurder
Baie geluk aan die wenner, dit is regtig 'n oulike sprokie.
Ek het net toevallig raakgesien dat die kompetisie sê dat die maksimum woorde mag 500 wees, en hierdie storie is oor die 1000 woorde, is dit nie bietjie onregverdig teenoor die ander inskyrwings wat by die maksimum 500 woorde reël gehou het nie?
Hallo Johan
Baie dankie dat jy die fout aan ons uitgewys het. Ek het so meegevoer geraak deur Elza se storie dat ek nie opgemerk het dit is te lank nie. Ek gaan wel steeds die prys aan Elza toeken, maar ons gaan 'n addisionele boekpakkie gee vir 'n sprokie wat wel binne die lengte-beperking gebly het.
Ons sal in die toekoms meer bedag wees daarop om ons eie reëls in gedagte te hou wanneer ons wenners uitkies.