Hallo George (en hello Wouter)
Op laerskool het ek die Swart Luiperd-boeke verslind. Sou ek die boeke minder geniet het as ek op daardie stadium agtergekom het dat Braam le Roux 'n skuilnaam was, dat die skrywer eintlik FA Venter was? Was Piet Cillié minder geloofwaardig as Dawie? Weier jy om Blou Willem te lees oor dit ooglopend 'n skuilnaam is?
Daar is verskeie redes hoekom 'n skuilnaam gebruik word en een van die hoofredes is dat dit 'n poging is om objektiwiteit by die leser te bewerkstellig. Jy wat George is het byvoorbeeld onder 'n skuilnaam matriekeksamen geskryf, naamlik eksamennommer-X, kan jy onthou?
Ek kan met redelike sekerheid sê dat, na jy my naam gekry het, jy my naam gaan google het. As jy dit NIE gedoen het nie, wat is die sin dan daarin om oor my skuilnaam te kla? Ek kon dan netsowel vir jou vertel het ek is Max von Kleist und Behring, of Jock Middleton Campbell of Colgrain, Dunbartonshire and Underriver House, of Josef Dauthendey, of Hardus Vogel van Benoni, of hoe?
Die aandring op identiteit dui op 'n geneigdheid tot vooroordeel; as ek 'n doktor in astrofisika is sal jy anders optree as wanneer ek 'n straatveër sou wees. Hoekom anders sal jy wil weet wat my regte naam is? Het 'n vraag van Professor Mynman meer gewig as wanneer Jan Alleman, of Jan Rap en enige van sy maats, daardie selfde vraag vra? Dat 'n joernalis wat neerhalend na 'apartheidskoling' verwys, wat met ander woorde doer bo hoog op die morele berg sit, nou so klasbewus kan wees. Ek hoop dit ís klasbewustheid aan jou kant want die alternatief is amper te gruwelik om te bepeins soos JBV sou gesê het, naamlik dat jy besef jy 'n borrel gehap het en nou probeer systap.
Ek vermoed sterk dat, helaas, laasgenoemde wel die geval is want jy hét nou my naam maar nou skielik moet ek die hele LitNet vertel wat my regte naam is anders is jy nie bereid om tot my 'gewaande debat' toe te tree nie. Watter debat? Ek sê vir jou die NSA is die rede vir swak leerlingprestasie, nie godsdiensonderrig nie. My redes is die feit dat onderwys agteruitgegaan het sedert 94 en nou totaal in duie gestort het, selfs die regering erken dit. Die redes vir jou standpunt is die feit dat Islam agtergeraak het en die uitlatings van ene Watson (wie se boek jy wil hê ek moet koop).
Ek hoop nie jy vind my trant te kras nie maar ek twyfel, iemand wat goedsmoeds ander se opvattings snert of bog noem sal kan vat wat hy uitdeel.
Groetnis
Jan Rap
Kommentaar
Beste Jan Rap,
Ek het geheel ooreenstemming met jou oor beide aangeleenthede - enersyds; dat die hele onderwys-dilemma in ons land aan swak regering toe te skryf is en nie Godsdiens nie, en andersyds dat skuilname wel 'n plek het.
Die enigste waar skuilname nie 'n plek na my mening het nie, is waar mense oor die belewenis van God in hul hart getuig.
Dis sekerlik anders as daar bloot oor Godsdiens gefilosofeer word, maar dis 'n totaal ander saak as iemand oor die belewenis van God in hul eie hart getuig.
Wanneer 'n mens oor die belewenis van God in hul hart getuig, dan is God die kwalifikasie en die inspirasie daarvan, en nie die draer se geloofwaardigheid nie.
God kies enigeen; van eenvoudige vissermanne tot vername burokrate as getuies. Daarom is dit verseker 'n dwaal as iemand hul selfgemaakte identiteit probeer beskerm, of voorhou deur te lieg daaroor, of om dit "privaat" te hou (sekerlik om hulself verleentheid te spaar en/of om hul eie ego te beskerm),
Dis in nederige dankbaarheid wat ek my doopnaam, en die gesig waarmee God my geseën het waar ookal die moontlikheid bestaan, in my getuienis met God se Lig in my hart uit te straal.
Die gesigloses soos Kobus de Klerk en die ander verskuildes soos "Dolf", Christenmoeder en die Alies in hul sogenaamde Godsdiens-debat, waaraan jy saliger nie deel nie, is duidelik beset met hul eie agenda in die uitdra van hul valse getuienis en in hul bespotting van die Evangelie. Let gerus self hoe verwaand en gereeld hierdie verskuilde en infernale bende so ewe stert in die lug, hulself prys as hulle ander kamstig gewen of "uitgewys" het in hul absolute eiewaan.
Boeregroete,
Cornelius Henn
Hello Jan,
Jan
Jy's te sensitief oor die "issue". As SêNet dit toelaat, is dit jou volste reg om 'n skuilnaam te gebruik. Dan weer, indien jy Dan Roodt self is soos ek baiemaal dink dit die geval is, of enige ander gesiene figuur, sou ek ook 'n skuilnaam gebruik om enige onvermoëns en verleenthede te wil verberg.
Jaco Fourie
Wouter
Selfs al gebruik jy 'n skuilnaam is jy tog verplig om jou volle naam en adres te verskaf aan die instansie wat die betrokke forum (koerant, tydskrif, LitNet wat ookal) bestuur of hanteer. So mens kan nie goedsmoeds gaan staan en laster en skel nie want jy kan maklik voor stok gekry word as jy oortree. En alhoewel ek 'n skuilnaam gebruik doen ek moeite om nie ad hominem te raak nie (behalwe in die geval van Francois Williams maar dan is dit retaliasiegewys). Ek het spesifiek die naam 'Jan Rap' gekies omdat, op 'n stadium, iemand voorgestel het dat net intelektueles toegelaat moet word om op SêNet te skryf. Die idee was om te wys dat die man in die straat ook tel, ook 'n stem het met ander woorde.
Jaco
Die feit dat jy baiemaal dink ek is Dan Roodt is die tweede grootste kompliment wat ek nog gekry het! Die grootste kompliment was toe die wiskunde- en wetenskaponnies saam nie fout kon vind met my oplossing van een van die drie klassieke meetkundeprobleme nie. Ek het self later die fout agtergekom maar intussen was ek op wolkie nr 11. Die wiskunde-onnie het nog gesê hy weet dis onmoontlik maar hy gee my toestemming om dit in meetkunde te gebruik as ek wil.
Groetnis
Hello Jan,
HeHe Jan!
Is dit nou 'n wanhopige poging om myself en die lesers te probreer beïindruk?!
Jaco Fourie
Beste Jan Rap,