Litnet

Dr Jurie van den Heever is ’n paleontoloog aan die Universiteit van Stellebosch. Hy is ’n erkende kenner op die gebied van evolusie. Die onderstaande respons van hom op ’n soortgelyke debat maak interessante leesstof.

"Wetenskaplike teorieë wat natuurverskynsels verklaar moet nie net toetsbare bewyse lewer nie, maar moet ook toetsbare voorspellings kan genereer. Evolusie voldoen by uitnemendheid aan beide hierdie vereistes. 

Die grondbeginsel van evolusie is dat alle lewe op aarde verwant is en dat organismes met verloop van tyd aanpas of uitsterf in reaksie op omgewingstoestande. Lewensvorme ontwikkel van eenvoudige na toenemend meer komplekse organismes. Navorsingsresultate in die paleontologie, vergelykende anatomie, genetika, embriologie, biochemie, fisiologie en mikrobiologie toon dat dit onteenseglik so is. 

Sterrekundiges en fisici het wiskundig bepaal dat ons sterrestelsel baie biljoene jare oud is terwyl geoloë die aarde se ouderdom op ongeveer vier-en-’n-half biljoen jaar wetenskaplik bevestig het. 

Evolusie voorspel dat fossiele van byvoorbeeld mense, of krokodille, of voëls, volgens hulle ontstaanstydperk op spesifieke plekke (tydvakke) in die geologiese opeenvolging gevind sal word. Mensfossiele is byvoorbeeld jonger as tien miljoen jaar en sal dus nie saam met dié van dinosouriërs, wat reeds vyf-en-sestig miljoen jaar gelede uitgesterf het, gevind word nie. Dit word ook so gevind. 

Kreasioniste wat ’n jong aarde voorstaan, besef dat sulke inligting hulle doodsteek is en probeer dit voortdurend met allerhande slenters omseil. Die bitterste pil was by Glen Rose in Texas, waar hulle jare lank kategories verklaar het dat die spore van "bybelse reuse" saam met dié van dinosouriërs voorkom. Toe hulle "mensspore" onbetwisbaar as verweerde dinosouriërspore deur ‘n Christen-geoloog uitgewys is, moes hulle vinnig verskoning aanteken en boeke en video’s aan sirkulasie onttrek. 

Netso is die berugte Kent Hovind ook uitgevang. As internasionale anti-evolusionis, kreasionis en superchristen het hy evolusie as leuen voorgestel, maar sy kriminele bedrywighede vir sy volgelinge verberg. Hopelik sal sy tronkstraf hom so kersten dat hy ook erken dat hy boonop gelieg het oor die besit van ’n geldige doktorsgraad. 

Enigiemand wat dus sonder grondige bewyse evolusie verwerp, verwerp die wetenskap as basis van ons bestaan. Om evolusie te weerlê moet die bevindings van bogenoemde vakrigtings weerlê word met toetsbare navorsingsresultate en nie lukrake twak wat uit die lug gegryp word nie. 

Plaaslik is ons voorste kampvegter teen evolusie, die verbete kreasionis Pieter Pelser. Hy is ’n jong aarde fundamentalis en sy oppervlakkige voorstelling van evolusie is so onwerklik dat dit dalk net ’n rookskerm is vir sy werklike stryd. Dit is om die NG Kerk in diskrediet te bring. Sprekend hiervan is sy onsuksesvolle poging om die teoloog Louis Jonker in sy amp te stuit en dan voor ’n gehoor te verklaar dat hy dit wel reggekry het. So ook sy uitspraak dat die dosente van die Stellenbosse Kweekskool evolusioniste is en daarom niks van teologie weet nie. Pelser se eienaardige gedrag slaan gevolglik baie op dié van ’n iesegrimmige kind wat nie sy sin kan kry nie. 

Dit is dan ook geen wonder dat die aansprake van kreasioniste deur hoofstroomteoloë, regslui en die meerderheid Christene die wêreld oor, verwerp word nie. Hulle irrasionele uitsprake maak ’n bespotting van die Bybel en behoort eenparig deur leraars afgewys te word. 

Dr Jurie van den Heever is dosent aan die Universiteit van Stellenbosch."

Groetnis

Thomas