Litnet

Daar is kort-kort ’n oproep, vir oor die 20 jaar al, dat rassisme moet end kry. So, hoekom na 20 jaar, is dit nog nie uitgeroei nie? Die antwoord is eenvoudig; niemand weet wát om uit te roei nie.
Indien rassisme diskriminasie teen iemand is op grond van velkleur dan is daar in hierdie land wel diskriminasie maar sleg teenoor blankes (universiteitstoelating, bevordering, beskikbaarheid van poste, toeken van staatskontrakte ens).

Indien rassisme die hekel is wat een persoon in ’n ander het op grond van velkleur dan is daar niks aan te doen nie behalwe nou as dit manifesteer in ’n oortreding van die wet (insluitend die grondwet). Rassisme is ’n kopding; die gevolg van jaloesie of stereotipes en dié weer is die gevolg van data verkeerdelik of onvolledig verwerk. En jy kan tog nie jaloesie, of die onvermoë om data te verwerk, kriminaliseer nie of hoe?

Rassisme in die NSA het egter ‘n ander definisie gekry naamlik enige kritiek deur blankes teenoor swartes en dit lyk my dít is wat hulle nou ’n kriminele oortreding wil maak. En dis absurd.

Daar is ’n probleem met hierdie oproepe tot brugbou want dit impliseer die bestaan van ’n kloof tussen groepe wat daar nie eintlik was nie. Selfde met hierdie gedurige soeke na kamtige versoening; dit impliseer ’n bestaande vyandskap en mense wat heeltemal gemaklik was met mekaar word nou onder die aandag gebring dat daar fout is; ons is eintlik vyande. As jy vir jou vrou ’n bossie blomme bring en haar onder die indruk bring dat dit ’n opmaakgeskenkie is gaan sy dadelik wonder wat jy verkeerd gedoen het. Niks fout met ’n bossie blomme nie, maar dan sê jy dis sommer net vir haar oor sy so oulik is. Dit verstewig ’n reeds bestaande goeie verhouding.

Hierdie gedurige verskoningvraery is dus niks anders as ’n gekrap waar dit nie jeuk nie; veral as die indruk geskep word dat dit veral van blanke kant moet kom soos Jaco se briefopskrif impliseer. Dit dui op ’n skuldgevoel wat voortspruit uit onheilige optrede uit die verlede en maak die ander groep briesend soos gesien kan word in byvoorbeeld die wreedheid waarmee plaasaanvalle gepaard gaan.

Jaco het wel ’n goeie voorstel wat betref die aanleer van ’n swart taal; dit is ’n bossie blomme vir die regte rede. Dit sal net moeilik wees want, benewens die feit dat die swartes Engels verkies, is daar soveel swart tale dat die een wat jy geleer het so te sê nutteloos gaan wees as jy verhuis.

Jan Rap