Patrice Motsepe en Afrikaans

  • 2

Die Motsepe-stigitng het onlangs hul nasionale rondgaande inligtingsessie in Mitchell’s Plain en Khayelitsha gehou. Die doel van die byeenkomste was om nieregeringsorganisasies in te lig oor die skenking van R500 miljoen wat die Motsepe-stigting oor die volgende drie tot vyf jaar beskikbaar gaan stel vir verskillende ontwikkelingsprojekte. Hierdie programme wissel van onderwys tot vennootskappe met gemeenskapsontwikkeling- en ander liefdadigheidsorganisasies.

Tydens die byeenkoms in Mitchell’s Plain was daar tussen 500 en 600 mense teenwoordig, van wie die oorgrote meerderheid Afrikaanssprekend was. ’n Groot aantal nieregeringsorganisasies het die geleentheid ook benut om te netwerk en meer inligting oor befondsing te verkry.

Danie van Wyk en Patrice Motsepe

Ek was deel van die byeenkoms en het die SBA verteenwoordig. Wat my teleurgestel én bemoedig het van die byeenkoms, was dat die burgemeester van Kaapstad en die LUR vir sport en kultuur in die Wes-Kaap hul toesprake in Engels gelewer het, maar dat Patrice Motsepe daarna sy hele toespraak in vlot en keurige Afrikaans gelewer het (nie ’n geskrewe toespraak nie, maar uit die vuis en uit die hart). Wat verder interessant was, was dat die gehoor daarna hul bydraes en vrae in Afrikaans tot hom gerig het. Hier en daar was ’n vraag of ’n bydrae in Engels, maar dit was in die minderheid.

Op ’n opmerking uit die gehoor dat mense nie bewus daarvan was dat hy Afrikaans magtig is nie, het Patrice as volg gereageer: “Ek het my skoolopleiding in Aliwal-Noord in Afrikaans ontvang en beskou Afrikaans as my moedertaal.”

Hy het voorwaar ’n bres vir Afrikaans geslaan. Ek wonder net wat die ander twee sprekers daarvan gedink het. Ons LUR vir sport en kultuur verwys altyd so graag na die ontvangs en die aanbied van kulturele warmte. Die mense van Mitchell’s Plain het kulturele warmte van Patrice Motsepe ontvang en positief daarop gereageer. Ons as Afrikaanssprekendes moet kennis neem van die feit dat daar ’n groot aantal swart mede-Suid-Afrikaners is wat net so passievol oor Afrikaans is. Hulle is die ikone in die swart gemeenskappe wat nie bang is om te sê dat hulle Afrikaans is nie. Daar is nog ’n hele aantal ander aan wie ek ook kan dink.

 

  • 2

Kommentaar

  • Avatar
    Johannes Comestor

    Danie van Wyk se skrywe laat my dink aan Louis en Charlotte Schachat se galery, Die Kunskamer, 'n onderneming wat in 1971 in Kerkstraat, Kaapstad, begin het en tans in Portswood-weg in Groenpunt bedryf word. Die Schachats is Joods. Louis is in 1926 op Robertson gebore en hulle huistaal was Afrikaans. Dit was vir hom vanselfsprekend dat sy sake-onderneming in die Kaapstadse middestad 'n Afrikaanse naam moet hê. Hy is vroeër vanjaar oorlede (Die Burger, 19 Feb, p 10).  Ek eer sy nagedagtenis.

     

    Johannes Comestor

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top