Litnet

Jaco het geskryf van die aanhangsels wat ons belastinggeld opvreet. Ons sien net die ore van die swemkoei. Die ANC sit met ’n ander monster aan die boesem en dit is die Congress of Traditional Leaders of South Africa (CONTRALESA). Die lot verteenwoordig die sogenaamde landelike  bevolking en is beslis nie demokraties verkose nie. Dit stryk glad nie met die huidige regime se sogenaamde demokrasie nie. Die mense sit en doen vet mooi nokkol. Ek sien nog die dag kom wanneer een van die manne ’n paal of iets soortgelyks iewers in Pietoria of waar ook al gaan inslaan en eis dat hy belastinggeld op die grond gaan hef. Sy voorvader het net na die sondvloed hier verby gekom is een van sy vroue is hier begrawe. Elke inwoner sal dan aan die Induna moet betaal want hy het mos nou gepraat. Die sogenaamde ander adellikes wil ek nie eers aan dink nie. Daar is mos altyd iemand wat iewers onder ’n klip uit kruip en sy pond vleis opeis. Oor die staatsamptenare wil ek net mooi niks uiter nie. Ek raak te erg omgekrap. In elke regering raak daar geld weg. Maar hierdie lot stel beslis nuwe hoogtes. Sowat van steel het ek nog nie in my lewe gesien nie. Wat my stom slaan is dat ons dit gelate aanvaar. Wanneer gaan die belastingbetalers wakker skrik en vrae begin vra en eise stel. Op daardie noot. Sal iemand aan my probeer verduidelik hoe ons ekonomie werk. Ons is sowat ses miljoen wat belasting betaal. Ons onderhou ’n moerse klomp met toelaes. Hoe klop ons boeke, of maak die regering iewers geld waarvan ons nie weet nie. My kop is te plat om dit uit te pluis.

Mag ons tog net behoede word. Ek vrees die dag wanneer daar nie meer geld is om te steel nie.

Reusedwerg