Nuwe Stories 2013-kortverhaalwedstryd: Tweede keurverslag van "’n Happy ending"

  • 0

’n Happy ending: Die tweede keurverslag deur Suzette Kotzé-Myburgh

 


Aan die skrywer:

Ag, ek is jammer dat my kritiek op jou slot jou so teen die grond had :). Maar ek is bly dat jy my aanbeveling gevolg het, want ek dink die nuwe slot werk baie beter. Die nuwe titel werk ook goed.

My beswaar oor jou vorige slot is moeilik om beknop te verduidelik, maar dit gaan oor die belangrikheid van realisme. Jy sê vir jou is Chamonique nie ’n vlees-en-bloed-mens nie maar ’n tipe – tog, om jou boodskap by die leser tuis te bring, is realisme jou beste voertuig (magiese realisme of fantasie is bitter moeilik, min skrywers kan dit suksesvol doen). Met ander woorde, as jy Chamonique as ’n regte mens uitbeeld, kan die leser ’n soort verhouding met haar vorm. Leseridentifikasie is ’n uiters belangrike deel van die leesproses, en die leser verbind hom/haar nie emosioneel op dieselfde wyse tot ’n algemene, abstrakte idee as tot ’n karakter nie. Kyk wat doen (goeie) digters: hulle vat ’n abstrakte of filosofiese idee en dan beeld hulle dit konkreet uit, met vergelykings, metafore en beelde wat vir die leser herkenbaar is.

Aan die ander kant vergroot fiksie vir meer trefkrag (die idee van larger than life), dit daag die grense van die werklikheid uit. Daar is ’n baie fyn lyn tussen genoeg en te veel, en ’n manier om jou storie te toets, is met die maatstaf van moontlikheid en waarskynlikheid. Soos Chamonique se kop wat afgekap word as sy na die skoonheidsalon gaan: dis moontlik, ja, maar dis nie waarskynlik nie (behalwe in ’n riller, natuurlik).

Vervolgens ’n paar voorstelle ter verbetering van jou storie, maar dan het ek nog een belangrike kommentaar om by te voeg: die inbring van die godsdienselement (Chamonique wat Paul by die kerk ontmoet en saam met hom kerk toe gaan) plaas jou op moeilike, glibberige terrein. Dis nie goed geïntegreer nie en ek stel voor jy haal dit heeltemal uit. Vroeër in die verhaal word Chamonique voorgestel as sinies en sonder enige Godsbesef, en dis heeltemal in pas met haar karakter: sy sal nie ’n Bybel uit ’n brandende huis red nie, en die engeltjies óf die duiweltjies kan haar maar kom haal. Wanneer sy nou skielik bereid is om kerk toe te gaan, al is dit om ’n ou te ontmoet, is dit glad nie oortuigend nie. Laat sy en Paul mekaar bloot by die restaurant ontmoet? Hy is ’n kliënt en sy flirt met hom en alles wat daarop volg.

Sterkte met die laaste skof!

Ns. Moet tog nie dat iemand die tatoe sensureer nie.

Klik hier vir nog terugvoer in PDF-formaat.


Lees die tweede weergawe: "’n Happy ending"

Lees die eerste weergawe: "Kopskuif"

Lees die eerste keurverslag oor "Kopskuif"

Terug na die lys Nuwe Stories-kortverhale: Tweede weergawe

Teken in op LitNet se gratis weeklikse nuusbrief. | Sign up for LitNet's free weekly newsletter

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top