Litnet

Op die sesde skeppingsdag besluit God toe dat hy ’n mens gaan maak, maar nie sommer enige mens nie. Nee, hierdie mens gaan soos hy (God) lyk.

Genesis 1:27: En God het die mens geskape na sy beeld; na die beeld van God het Hy hom geskape.

Dink  ’n bietjie hieroor na. As ons na God se beeld geskape is, waarom is ons nie ook onsigbaar nie? Behalwe vir die donker gestaltes wat snags in die donker rondkruip, sien ons mekaar mos duidelik. Dan wonder ’n mens: hoe lyk God nou eintlik? Lyk hy soos ’n Asiër? Het hy dalk skewe ogies soos ’n Japannees, en is hy wit of swart of dalk geel? Het hy dalk die gelaatstrekke van ’n Eskimo, of lyk hy soos ’n Zulu of Khoisan? Dalk lyk hy soos ’n Amerikaanse Cowboy of Rooihuid. As hy saans so kaal voor sy spieël staan, wens hy soms dat hy darem vir hom so ’n ekstra vier duim kon aangesit het? ’n God kan mos nie so ’n kort outjie wees nie, wie sal dan voor hom kniel?

Wat meer is, hierdie mens het hy sommer so uit stof en grond gemaak. Sy vrou se skepping was iets meer gekompliseerd. God moes Adam eers aan die slaap maak om een van sy ribbes uit te slag, wat Hy dan gebruik het om Eva van te maak. En siedaar! Ons se oer-oupagrootjie was ’n hopie grond en ons oer-moeder was ’n ribbebeen.

Hierdie storie wat deur ’n bewoner van die woestyn 4000 jaar gelede geskryf is, is vir Christene heel aanneemlik en daarvoor vra hulle nie bewyse nie. Kom dit egter by die evolusieteorie wat sê dat die mens en die sjimpansee dieselfde voorouer gehad het, en dat dit bewys is deur duisende wetenskaplikes, dan druk hulle hulle oë en ore toe, en vra naarstiglik na bewyse. Dan skryf Kobus op SêNet hierdie snert en praat hy agter sy dominee aan wat beweer dat die evolusieteorie sê dat mense van ape afstam.

Iemand, ek weet nie meer wie nie (dit kon Aristoteles of Voltaire gewees het) het gesê dat as die mens soos ‘n kakkerlak gelyk het, dan sou God ‘n groot en magtige Kakkerlak  gewees het.

Groete
Angus