noulat COPE hul oud-neo-Stalinis verloor’t,
ANC uit Mangaung, Lawaaihoek gat lawaai,
SABC als agitproplik, eeufeeslik, uit gat saai,
vrye pers, vir ’n wyle, vry in en uit kan asem,
Moeder Afrikaans “isiBhulu”-mantel af wil skud,
taalgelykheidsbeleid, ’n nastrewenswaardigheid,
Afrikaanses uiteindelik tot Kontinent toegewyd,
Moederlandliefhebbend, altruïsties-patrioties
keer Marx, sowaar, skimagtig, terug,
warm teorieë van “ras” en “klas” op,
illusies, pseudo-fiktiewe fiksionaliteite,
asof enigiemand een definisie van elk,
uit duim uit kan suig, optower, verbeel
span selfs kapitalis Marx se faux pas in,
verbeel hul “ras” en “klas” maak sin,
asof’t heerser langer aan bewind hou,
asof geklassifiseerde ooit klassifiseerder,
rassis ooit objek, van eie optowerteorie,
met eie vooruitgang sou wou vertrou,
via “ras” en “klas” ’n beter verhouding,
tussen voorheen verdeeldes, oud-vyande,
demokrasie vir die meerderheid sou bou
toeka was tydsgees oudskool, outyds,
tradisioneel konserwatief, behoudend,
enigiets tussen verkramp en verkrimp,
soos’t goeie kerstenmense sou betaam
God sedert Bloedrivier aan inkommerkant,
al’s Gelofte stilswygstuiptrekkingsgewys,
soos allie anner “Duiwelspiek”-trieks,
ergens, in vergetelheidsgraf toegegooi
moes Herrenvolk Marx se denke ietwat plooi,
solat Pirow, Malan, Verwoerd, Vorster, Botha,
ooglopend oorhoeks, gefassineer, deur’t was,
etno-nasionalisties, proto-fascisties, rassisties,
uiting kon gee aan God se Wil vir hul, Beloof,
lat hul “Duiwelspiek”-dissipelkweekskool, eish,
enige regdenkende se hare regop sou laat rys,
probeer t’beweer, hul’s reg, so te segregeer,
aan joiners, oor grense heen, steun t’verleen
van vroeg af’s struktuurgeweld deur burgers aangewend,
in gewillige dienaars, dienaresse, slawe se koppe ingeprent,
soos een boos spel, geheimsinnig, wetenskaplik-onmenslik,
mede-Mens, mede-“gelowige”, deur onkunde-ontkenning,
by wyse van spreke, deur super-ultra-onmenslik optrede,
elk stuk boosheid, sosio-ekonomies, in Gods Naam ingespan
voorheen-bevoorregtes nog voorkoorlik voor,
wynplaaslik eksklusief, strandhuislik privaat,
vierwiellik ietwat verhef, bó neo-proletariaat,
per stuk van sake net so onkunde-ontkennend,
onvergeeflik-onvergewensgesind, lafhartig,
as allie anner opportuniste, fortuinsoekers,
onbewus, dat meerderheid Marx se muse is
Jacobus Faasen