Liefde is ... Inskrywings (III)

  • 0

Hier verskyn nog inskrywings wat vir LitNet se skryfkompetisie "Liefde is ..." ontvang is.

Inhoud:

  • Annika Pretorius
  • Desiré Dannhauser
  • Olga Leonard
  • Linda du Plessis
  • Zalman S Davis
  • Riëtte Salzmann
  • Michèle Meyer
  • Estelle Piek
  • Susanne Pike
  • Jonine von Wielligh
  • Jolene Coetzee
  • MM Coetzee
  • Ita Froneman
  • Annamarié van der Vyver

 

Annika Pretorius

Wat is liefde presies?
Dis nie net soen en vry
Of hoeveel drukkies jy kan kry
Maar soos ’n skildery

Jy het altyd ’n idee wat om te verf
Maar sukkel om partykeer die kleure te kry.
Dit kan of Mona Lisa-goed wees of ’n totale gemors 

Soos blou en rooi wat pers maak
Of alle kleure wat grys raak
So is liefde vir my
Wat deur jou hart kan sny

Daar is die antwoord na ons vraag
Dis skoenlappers in jou maag
Jy voel of warm binne of geskeur
Maar dis iets wat niemand kan keer 

Nie om in mekaar se hare te wees nie
Maar om mekaar te wil sien
So wat is liefde
Wel dis eenvoudig

Dis pleinweg
Jou keuse wat jy daarmee wil doen
Is dit sleg of goed
Reg of verkeerd

Maak jou keuse
Want dis ’n reuse
En maak hom reg
Want dis wat liefde is.


 

Desiré Dannhauser

Soms wonder ek, hoe lief ek jou het?
Ek tel die sand aan die see,
korrel vir korrel,
maar dit raak op ...
Ek gryp elke ster in die hemel
tot ek my hande leeg afbring.
Ek luister na horlosies
hulle raak stil.
Een vir een.
En ek weet ek sal eers weet
as ek ook op is.


 

Olga Leonard

Liefde is al

My liefste, sing vir my vanaand
en vertel my weer dat jy my lief het,
want iewers tussen sweef en val
in ’n oomblik van besef
is liefde al wat ons het

Woorde is waardevol soos goud
akkoorde raak mense, jonk en oud,
maar iewers tussen doof en stom
in ’n oomblik van besef
is liefde al wat ons het

Die wêreld eggo onsekerheid
met oorloë aan die orde van ons tyd,
maar iewers tussen goed en kwaad
in ’n oomblik van besef
is liefde al wat ons het

Alles hier is tog net tydelik
en eendag hierna sal ons begryp,
maar iewers tussen nou en dan
in ’n oomblik van besef
is liefde al wat ons het.


 

Linda du Plessis

Liefde is ...

Jesus –
die genade van Bo
die kruis in die middel
om sy gebooie te bewaar
my naaste liewer te hê as myself

my geliefde –
daardie eerste oogopslag
toe my hart se lyngrafiek
uit sy lub-dub spring
my hartklop laat
my are bruis
en my laat drink uit die fontein
vol genot, vreugde en plesier
sleepvoete laat trippeltrap
my vonkel in my oog

my kind – die eerste suig aan my bors
om jou in my arms te troetel
daardie spoegies op jou eina
deurnag by jou siekbed te waak

in die natuur –
in die skyn van die son in die dag
die maan helderder glimlag
sterre speels laat knipoog
wat elke sekonde die suurstof
in my asem laat vloei
om die vuur te laat brand
vir die energie en lewenslus
sodat ek op die vlerke van ’n arend
die hoogste hoogtes kan bereik

Afrikaans – my passie vir jou my taal
om daarin te dink, skryf, praat en dien
die rede vir die gediggie wat ek skryf
in ’n taal wat ek bemin en sonder musiek
op die strand kaalvoet te dans

ek myself –
die mengelmoesbestanddele vir die resep
vir my medemens waarmee ek –
geduld, omgee, respek, teerheid,
mededeelsaamheid, vertroue,
humor, romanse en gawes
van die Gees uitdeel, vergewe en vergeet,
hoop, troos, glo in mekaar,
dra mekaar se laste, sagsprekend,
trots is op ander se sukses,
deernis, begrip,
geloof en hoop uitdeel

die veiligste hawe –
met die lekkerste en langste reis in
’n wêreld en land met goed en kwaad
toevou in onthou-herinneringe
die kosbaarste geskenk van Bo

ja ... liefde is om vir almal te lewe
maar ook om vir almal te sterwe

maar soveel te meer
liefde is jy –
my Valentyn


 

Zalman S Davis

Jou liefde sal om my verstyf

Liefde vorm wanneer Picasso
sy kwas in rooi doop en die buitelyne
van jou mond op canvas vorm,

die gousblomme op die dorre
Karoo-vlaktes knoop,

En jy, my lam,
wat met jou lyf
in my lêplek nesmaak.

Ek onthou toe jy wieg-wieg
in my arms lê op ’n Guy-Fawkes-aand
op Mosselbaai,
en vir my singend van appelliefies vertel het,
en die skape teen die berg se hange.

En nou’s al jou liefde om my verstyf
wanneer ek die sterre
soos bruin vlinders
vanuit die lug pluk.


 

Riëtte Salzmann

My beminde is ’n braaivuur

In aandskadu flankeer jy met my.
Sigeunervonkies flenter tussen ons deur.
Jy knetter en skerts
met die druppende vet.

Jou soet-uie en bierbroodgeur
vermeng met hardekool en tjops
bedwelm –
laat my soos 'n verslaafde voel.

In jou rookswepies dans vreemde feë.
Jy knars antieke inkantasies.
Jou gloeiende oë beduiwel my –
ek kan skaars asem kry!

My hande berei die offermaal
soos 'n kneg in jou tempel:
die blindevinkies is lankal gaar
maar ek kan nie ophou staar.

Al taan ons passie tot ’n hopie as,
smeul jy heelweek in my hart.
Op ons getroue sabat
sal ek weer jou altaar bou,
in my godin se warmte baai
en ritueel my vleisies braai.


 

Michèle Meyer

Vloed

want jy syg al inner my wese deur
tap my boordensvol
versuip of nie, ek wil nie keer
skater soos jou stroom my rol

tap my boordensvol
tog laat ek my wetend sleur
skater soos jou stroom my rol
duik in jou brekers weer en weer

tog laat ek my wetend sleur
deur die deining banger blou
duik in jou brekers weer en weer
lig my anker laggend vir jou

deur die deining banger blou
breek sonlig blink die dag
lig my anker laggend vir jou
al weet ek vloedskade wag


 

Estelle Piek

sluit die deure dig vanaand
draai grendel in die slot
hoor die wolwe buite huil
stoot windvlaag om die hoek
sien die kersvlam flikker flakker
skadu’s teen die muur
uit hoeke donker wat daar loer
digby in die vuurkring van die vlam
net jy my lam
sprei wyd die velkaros
jou asem teen my keel
weet dat in jou binnekring
ek vir altyd mag skuil


 

Susanne Pike

liefde is ’n tydbom

per maand    per week    per dag
per uur
(per se)
het ons passievuur
verskrik verstik
in genadelose terugtik
van kwaliteittyd –

skugter geretireer as ek dit weer
in my kaal arms wou vang
om die bitterallenigheid (bang)
aan die klokwerk van jou hart te hang: 

in my toekomsberou
sal ek steeds ons tydloosheid onthou
as ek ons loslyfliefde
nog net één ewige sekonde
in my hartseerhande vas kan hou


 

Jonine von Wielligh

Die swygtaal van liefde

Trippel-woorde soos hartlam of liefie
tree nie oor die drumpel van jou lippe nie,
jy bring nie gerwe blomme of donker sjokolade huis toe nie,
jy koop Nike-tekkies vir ons seuns
en twee brode as ek vra vir een

Jy trek my kar uit die garage
as ek werk toe moet ry op 'n ongure uur,
stip-betaal die Telkom-data en wanfunksionele munisipaliteit,
dit alles doen jy woordloos vir die huis

Saans vat jy die wasgoed waskamer toe
en sluit ons hekke teen die nag se rower-oë
jou handelinge is ’n endossement van sekuriteit
om te voorsien is hoe jy liefde gee


 

Jolene Coetzee

Liefde is:

Skyn helder soos roosblare.
Het nie nodig vir spesiale gebare.
Gee nie net met oorgawe.
Maar raak ook aan jou hart se snare.
Lei jou aan die hand.
Deur die see se sand.
Sing vir jou ’n lied in die more.
Vee weg gebroke spore.
Maak die hart nie seer.
Vergewe al is dit teer.
Liefde is bedoel.

Vra jou om te dans.
Gee jou nog ’n kans.
Rooi is sy kleur in ink geverf.
Fluister in jou oor dat hy jou sal bederf.
Staan jou by deur dik en dun.
Kyk na jou al maak als nie sin.
Deel met jou hartsgeheime.
Laat jou loop op reguit lyne.
Vriendelik soos geskrywe staan.
Kom ons Prys ook Ons Koning se Naam.
Liefde is bedoel.

Laat jou hare waai deur die wind.
Bring huis toe nog ’n verlore kind.
Groet jou goodbye met sterre in die oë.
Laat jou aan wonderwerke glo.
Gee jou rede om in die oggend op te staan.
Jou geliefde langs jou te gewaar.
Spreek die Lewe teen negatiewe gebeure.
Verlos is ons wat na Liefde strewe.
Nie net ’n gevoel.
Liefde is bedoel.


 

MM Coetzee

Liefde is ...

soos gronderosie
hy bring nie altyd troos nie
liefde is soos ink op papier
as dit jou hart vul met plesier

liefde is blind
die emosie kan jou hart vermink
liefde is soos ’n nat koekie seep
glibberig as hy jou hartjie breek

liefde is soos die oseaan
hy's oral waar jy gaan
liefde is my rigtingwyser
as ek na my hartklop luister

liefde is soos kanker
vir baie is dit ’n anker
liefde is ’n gevoel
weet jy wat ek bedoel


 

Ita Froneman

Liefdesbeloftes

my liefde is ’n borrelende fontein
in klare water wat jou koel oorspoel

my liefde is huppelgras
golwend oor savannas as dansende droomgodin

my liefde is laatsomerreën
lafenis as jy dorstig verlang na swanger beloftes

my liefde is ’n varsgeploegde land
vrugbare rooi sooie omgedolwe
dat ek jou saad kan ontvang en groei

my liefde is herfswinde
goue fladderinge van fluisteringe
in die laat sterrenag

jou stem is golfsuisinge
jou oë die oseaan se bitterblou
jou lippe op myne: ligfletse kristal
jou vingerpunttreë: die sug van maagde

want ons liefde is sonlig
wat oor my skouers vou
in splinterglas-oomblikke

ons liefhê is …

tydloos
matelose voleinding
in seisoene van omgee


 

Annamarié van der Vyver

Drie-rigting-spieël

Wynrooi romp
wat hang in die kas:
Versmoor
deur ’n plastiekjas.
Die growwe sy se voue
gooi skadu’s
op die verbloemde skeur se las.

Strepies korset
het my opgewonde hart
destyds mooi beteuel.
Nou hang die lap pap, sonder vorm,
die verwagtinge was te veel.

Osbloed-leerskoene,
met gespes om die enkels,
het my nog jare lank gedien.
Min het ek geweet: die skoen sou nie pas nie ...
Hoe kon ek die toekoms in sien?

My ouma se sentimentjuwele
en handsakkie van satyn
was gebêre vir hierdie dag.
Ook haar seemsleer jas teen Karoo se ryp
vir terwyl ek op my bruidegom wag.

Ek doen self my grimering en hare
met valsdiamantknippies en beskeie gipskruid.
Beskou myself in die drie-rigting-spieël,
Min wetend ek’s ’n verkulde bruid.

Vandag as ek blaai deur die album
met foto’s in silwer ink beskryf,
sou ek graag, in liefde wat was,
jou wynrooi, gestreepte das
soos ’n galg om jou nek wou styf.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top