Litnet

As jy God sou leer ken, sou jy die werklikheid ook leer - daar is Ewige Lewe. Maar, logies, nie op aarde nie, want die aarde sou uiteraard algar nie kon akkommodeer nie.
Jou desperate noodroep se konklusie is ook so onlogies en sinneloos ... watter logika is daarin om te wil redeneer dat mense gebore word met al die kompleksiteit (meeste waarvan nie fisies sigbaar in die wye sin daarvan is nie) wat daarop volg, en dan sal die 'lewe' sommer so subiet ophou sonder meer. Dit is wat jy glo, en dit is besonder kortsigtig. Leer dit - alles wat bestaan is nie vir jou sigbaar nie, selfs met geringe biologiese kennis behoort jy dit te weet. Dit wat van jou maak wie jy is, is 'n voorbeeld daarvan. Tog is dit wat vir jou onsigbaar is vir jou nie-bestaande (eerder onbegryplik) en so is dit ook met die Ewige Lewe, welke noodwendig elders buite die grense van die sigbare materiële stelsel beleef word en dus vir jou onsigbaar is. Die lewe op aarde is slegs 'n fase in die ewigheid ... Energie, die kern van lewe, vergaan nooit (en God is die Gewer en Bestuurder daarvan). Dit verander net soos nodig.

Beste Kobus,
Dankie dat jy my vraag beantwoord het. Ek wou weet wie het vir jou vertel dat energie nie vernietig kan word nie. Nou weet ek; jy het dit in ʼn skoolboek gelees.
Jy het reg; ek het lankal vergeet wat die skoolhandboek van termodinamika sê. Toe ek op skool was, het ek ook gedink ek weet alles, soos jy nou. Dis eers na skool dat ek uitgevind het dis beter om skoolwetenskap en skoolwiskunde te vergeet, want dis maar van min waarde. As jy eendag verder gevorder het as jou skoolboek, kan ons daaroor gesels. Op die oomblik is ek nie lus om op die vlak van wat-was-eerste? die-hoender-of-die-eier? met jou te redeneer nie. Net om jou darem te troos: energie kan nie vernietig word binne ʼn geslote stelsel nie. Net om jou verder om te krap: dis juis hier waar julle gelowiges kleitrap met die tweede wet van termodinamika.
Ek kan bewys dat God van die Bybel blote versinsel is; ek het dit al tot vervelens toe hier op SêNet gedoen. Wil jy dit weer hoor?
Groete,
Angus

Beste Angus
Jy sê jy het vir Kobus gesê dat "Ek het al male sonder tal, tot vervelens toe, al vir jou bewys dat God slegs 'n fiktiewe karakter binne die Bybelverhaal is."
En dan haal jy 'n klomp voorbeelde aan. Wat jy eintlik bewys het is dat die mense van die Bybel se wetenskaplike kennis gemeet aan vandag ver te kort geskiet het en dit het dan ook hul waarneming van gebeurtenisse en die opskrifstelling daarvan in die wiele gery.
Maar foutiewe waarnemings, vertolking en opskrifstelling is so eie aan die mens soos eet, drink en slaap. Ek is seker as jy 'n afspraak met iemand maak en sê “Ek sien jou more” dit nooit by jou opkom dat soos die Engelse dit uitdruk '"Tomorrow never comes" because it is a general truth: no tomorrow ever comes, because when it does come it's today.
Daarom is tyd 'n illusie. Die skeppingsverhale is dus gegrond op dit wat die mense wat dit opgeteken het, gereken plaasgevind het en daarin het dit nooit gegaan oor die hoe maar wel oor die Wie - die Oorsaak -.
Die verhale is eers oorvertel en eers gedurende die ballingskap opskrif gestel, hoofsaaklik as teenvoeter vir die Babiloniese skeppingsverhale wat baie gode - dus baie oorsake - gepromoveer het.
Die Jode in ballingskap het egter die heelal en alles wat daarin is as een gevolg van een oorsaak gesien. Omdat die heelal ontstaan het agv iets, wat vandag vervat is in die Oerknal-teorie, beteken dit dat dit 'n begin en dus ook 'n einde het.
Daarom het die Bybel ook 'n begin en 'n einde en is dit wat tussen die twee val soos 'n nagwaak, 'n nietigheid gemeet aan die oneindigheid en 'n mens se lewe soos gras, groen in die oggend en verdor in die aand as jy weer verby dit stap.
Omdat die wetenskap ook slegs beoefen kan word tussen die begin en die einde kan dit slegs betekenis hê en betekenisvol wees in die tydperk wat tussen die begin en die einde lê. Daarna hou dit op om te bestaan en het geen doel of waarde in die dimensie wat bestaan het voor die Oerknal.
Hieruit volg dus dat hemel en hel nie bestaan in ons heelal nie en dat jy dus nie deur vuur gemartel gaan word tot in ewigheid nie al glo mense dit ook. Oor Christus skryf Adrio König soos volg
Alle Paaie lei na Jesus: Jesus Christus – Adrio König
4.12 Jesus Christus
4.12.1 Skepper
Daar het ’n baie algemene oortuiging onder Christene posgevat dat Jesus “net die Skeppingsmiddelaar is”. Dit sou dan iets minder beteken as Skepper. Hy sou maar net die instrument wees deur Wie God alles geskep het, sodat net God die Vader die Skepper in eintlike sin is.
Dit is egter nie die volle verhaal nie. Christus word bely as Skepper op presies dieselfde vlak as die Vader. In Johannes 1:1-3 verwys Johannes doelbewus terug na Genesis 1 waar God die Skepper is. Maar Johannes pas dit direk op die Woord toe. En hy beklemtoon dat Hy Skepper is: “Alles het deur Hom tot stand gekom; ja, nie een enkele ding wat bestaan, het sonder Hom tot stand gekom nie.” Verder aan in dieselfde lied herhaal hy dit: “die wêreld het deur Hom tot stand gekom” (1:10).
Ook Paulus plaas Hom langs die Vader in sy belydenis: “Een God: die Vader, uit wie alles is … en een Here: Jesus Christus, deur wie alles bestaan” (1 Kor 8:6). In Openbaring 3:14 is ’n effens moeiliker uitspraak. Vroeër is vertaal dat Jesus “die begin van die skepping van God” is. Die Grieks verwys egter skynbaar na ’n veroorsakende begin sodat ’n mens kan vertaal: “Die Een wat die skepping begin het” of “die Oorsprong van die skepping” (NLV). Dit is ook wat ons in Kolossense 1:16 kry: “Want in Hom is alle dinge geskape … alle dinge is deur Hom en tot Hom geskape” (1953).
Wat beteken dit nou vir my as Christen? Christus het bestaan voor die Skepping - dus voor die Oerknal en het dus bestaan in die oneindigheid en is dus oneindig en net soos die oneindigheid nie word nie maar is, so is Christus.
Hemel as woonplek is dus nie te vinde in ons heelal nie maar wel in die dimensie wat bestaan het en nog bestaan voor die totstandkoming van ons heelal. So sal jy verstaan dat alle afgode bestaan in ons heelal. Daarom is Osiris die god van die hiernamaals, die onderwêreld en die dooies, al het sommige Egiptenare sommige dooies ook as lewendes beskou.
Christus daarteen is die Koning van die lewendes in ons heelal en hierna. En hiermee is my 600 woorde beperking ook verby.
Mag dit met jou goed gaan.

Beste Kobus,
As ek dan so in onkunde leef, waarom lig jy my nie in nie? Verduidelik vir my hoe 'n letterkundige karakter, soos bv God van die Bybel, ook buite die Bybel leef. Dan gaan soek ek na Bart Nel. Ek sal graag met hom wil gesels.
Het nie al gewonder of dit nie jy, Kobus de Klerk, is wat in jou eie fantasie leef nie? Het jy dit nie nog nie eienaardig gevind dat net jy, Kobus de Klerk, so verskriklik kundig is en dat al die ander mense rondom jou so in onkunde voortleef nie?
Dit is so dat energie nie vernietig kan word nie (so sê die mensgemaakte wet), totdat iemand in die verre toekoms dalk kom en 'n nuwe wet skryf. Vir 'n gegewe hoeveelheid energie is daar egter 'n bepaalde hoeveelheid moontlike rangskikkings van molekules in 'n substansie wat herrangskik kan word en dit staan bekend as entropie. Nuttige energie kan so nutteloos word.
Groete,
Angus

Verstaan julle trieks die Bybel? Wel, dit lyk nie so nie ...