Kamp kerkhof
Hy het die kindertjies na Hom toe laat gaan
Die kindertjies van Meerbank en Irene
Vel geraamtetjies
Kindertjies van Alliwal en Betulie
Laaste snikkies
In tente wat ruik na koors en nood
waar moeders leë-oog moet wyk voor die dood
Hy het die moeders na Hom laat gaan
Moeders wat siel gedood niks meer vra
as die doodsengel
Uit haar arms kom haal
Haar dowe oë gesluit
Teen die smart en magteloosheid
Oor die onverstaanbare
Die onverklaarbare
Godsbesluit
Hy het hulle na Hom toe laat gaan
Kinders en vroue
deur oorheersers vermoor
Met die dood soos ’n skadu
wat trap in sy spoor
Soos ’n Herodus in sy moordlus en haat
Is die dood nou in ’n kakie-gewaad
Wat moeders en kinders
deur Helkampe na Hom toe laat gaan
Kommentaar
Uitstekende digwerk!
Dankie dat jy ons aan hulle herinner. Watter menslike, onrustige, diep meegevoel met dié kinders en ma's verwoord jy hier Kobus!
Eisj.
Aliwal en Bethulie.