Jong lesers: Kaitlyn Sookdhew resenseer Ek was hier deur Nanette van Rooyen

  • 1

Ek was hier
Nanette van Rooyen

Uitgewer: LAPA
ISBN: 9780799354966

Nanette van Rooyen se Ek was hier is ’n inspirerende jeugroman. Hierdie is ’n storie vol liefde en geheimsinnighede oor twee tieners wat baie struikelblokke moet oorkom om saam te wees.

Hierdie storie word deur twee karakters vertel, Frankie die vroulike hoofkarakter en Milan die manlike hoofkarakter. Dit begin met ’n geheimsinnige papierrot buite Frankie se venster wat lei tot ’n boodskap en gevolg word deur ’n maand van liefdesboodskappe in die vorm van groen graffiti wat oral in Groenpunt opduik.

Frankie is lief vir kunsflieks en sy ry skaatsplank. Haar pa is ’n Nederlandse sjef was ’n bietjie mal en anders as Frankie is. Haar ma is ’n hippie wat wil weet wat in Frankie se lewe aangaan, maar soos met die meeste tieners wil sy nie met haar ouers praat nie, veral nie oor haar liefdeslewe nie.

Milan is die nuwe ou in Frankie se klas wat graag sy baskitaar speel. Hy luister ook Pink Floyd en Led Zeppelin. Sy pa kom uit ’n kommunistiese land. Hy is ’n stil, sagte man met ’n swart gordel in judo. Hy het sy seun alleen grootgemaak. Milan is skaam en herinner Frankie aan ’n vampier met sy swart hare en bleek vel.

Die hoofkarakters in die roman is baie realisties. Milan en Frankie ervaar al die onsekerhede van ’n hoërskoolromanse. Die leser kan maklik met die karakters identifiseer, hulle doen dinge wat gewone tieners doen, soos om oor hul ouers te kla.

Ek was hier het LAPA se jeugromankompetisie gewen. Dit is ’n boek vir mense van alle ouderdomme en as jy op soek is na ’n boek om jou woordeskat op te knap, beveel ek dit aan. Ek was hier is ’n roman wat ’n raaisel, ’n tragedie, ’n komedie, ’n drama, ’n aksie-storie en ’n romanse alles in een is. Hierdie is ’n boek waarin jy gaan skaterlag, snot-en-trane huil, smoorkwaad word en weer lag tot die trane rol. Dit is ’n boek oor tieners vir tieners.

  • 1

Kommentaar

  • Avatar
    AthenA Coertze

    Is jy ook 'n tiener "vreemde ouers", lees hier oor Frankie se vreemde ouers! Frankie vergelyk haar pa Ben van Luffelen met Shrek op 'n BMW, en hy kom stel haar by die skool in die verleentheid. Aarde sluk my in, berge bedek my!

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top