Litnet

Joan Hambidge lees ’n villanelle voor

Vir Heleen Louw

het jy ooit
dubbel intuïtief
as vrou en digter
vermoed

dat jy sou gee
wat die villanelle
van jou vra

in flikkerige elektriese lig
vir die versindaba

op die verhoog
om die setwerk te voltooi

gee jy aan koeplet
en tersine sy refrein:
sy het my vir altyd verlaat

gemeet afgeweeg
deur die fyn geteelde intellektueel
op die palm van sy hand
’n pond vleis

niks minder
niks meer
ek vat net dit wat myne is

oorganklik die refrein
sy het my vir altyd verlaat

welgeskape dans die villanelle jou vooruit
alleen
in die nagalm van die woordfees
bly jy staan

georden
kortsluitend die refrein
sy het my vir altyd verlaat