hulpeloos en magteloos

  • 1

Foto: Canva.com

hulpeloos en magteloos

die waarheid is naak 
soos ’n angsbevange vrou 
vasgekeer tussen die mure 
van haar eie huis 
waar sy gewoonlik 
vreesloos kan beweeg 
sonder ’n onbekende monster 
met wellus in sy oë 
wat ’n mes teen haar keel druk 
en haar verhoed om te gil

’n hulpelose vrou 
wat net magteloos kan toekyk 
hoe haar klere afgeruk word 
van haar bewende lyf 
met die grootste geweld 
en minagting 
deur ’n sadis 
sonder enige respek 
vir haar privaatheid 
sonder enige gewete 
met net die siek 
siek bevrediging 
van sy drange 
op die brein

hy’t op die vlug geslaan 
soos die lafaard wat hy is 
maar saans keer hy terug 
om haar uit die slaap te hou 
of om haar opnuut 
in haar nagmerries 
te teister 
waaruit sy uitasem 
en natgesweet 
wakker skrik

soms staan hy in die donker 
en steek vir haar tong uit 
maar as sy weer kyk 
is hy nie daar nie

sy kry dit nie oor haar hart 
om die polisie te bel 
of selfs haar beste vriendin 
daarvan te vertel

sy voel te skaam 
te vuil 
te goedkoop 
want sy’t nooit ingestem 
tot dié walglike daad

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top