Hoe troon julle bo ons uit
Tambo, Van Riebeeck en Kruger
vertel julle eie stories in stilte
vir enigeen wat wil hoor of leer
Julle staan gesaai in onse moederland
vaders, broers, susters en moeders
Hoe praat julle sonder woorde
vertel 'n geskiedenis van hoop
Mandela en Gandhi
so vir almal in die verbyloop
Julle was vaders, broers, susters en moeders
Hier in onse moederland
Hoe tuur ou mevrou Queen Vic
staar stoer in die niet
geklee in outydse drag
perfek in brons gegiet
Julle is ons vaders, broers, susters en moeders
hier in onse moederland
staan julle om ons te verenig
in 'n hegte band