hierdie vakansie

  • 20

Foto: Canva.com

hierdie vakansie 

hierdie vakansie 
wil ek my moeë lyf 
lawe met seelug 
genesend soos salf 
op seer spiere 
hierdie Desember 
wil ek my hoopverlore hart 
opmerksaam olie 
met gesellige samesyn, 
vele braaivleisvure 
’n bietjie rooiwyn, 
’n bietjie lag 
’n bietjie doelbewuste lewe 
hierdie Kersfees 
wil ek my siel 
doop in die see 
se oneindige dreuning 
onderdompel 
ek wil brood kan breek 
saam met my geliefdes 
wyn kan skink 
water kan drink 
weer gebore word 
en opstaan tot 
’n nuwe besef 
’n nuwe wete 
’n nuwe lewe
in ’n nuwe jaar

  • 20

Kommentaar

  • Lelanie Kruger

    Jy verstaan wat ons almal voel en vers dit.

    Jy vra en verteenwoordig die veerlig waarna ons streef om die vragte futloosheid te gaan herlaai by die soms vergete verlede Desembers. Dankie vir jou nuwe onthou daarvan. Jy skryf uitsonderlik. Welgedaan.

  • Elsabé de Vries

    Jy het my eie ervaring so mooi verwoord! Die see is my lafenis … met ’n uitsien na vernuwing. Wel gedaan!!

  • Riaan Esterhuyse

    Thx ou maat. Jou beskrywing is soooo visueel dat ek myself binne die gedig kan plaas.

  • Ongelooflik beskrywend geskryf. Net soos baie van ons dit ervaar en gevoel het na 'n uitdagende jaar.

  • Pragtige gedig, veral hierdie woorde: "wil ek my siel/ doop in die see /se oneindige dreuning." Kos vir 'n mens se siel; padkos vir die Nuwejaar.
    Dankie, Willem de Swyger.

  • Corné Volschenk

    'n Intieme universele sielshunkering effektief verwoord met 'n alombekende vereenselwigbaarheid deur die aanhoorder daarvan. Mag daar nog baie hart- en sielsgedagtes deur jou skeppende hand met ink op papier geëts word en dien tot diepe stof van nadenke vir vele. Hou aan skep, Willem. Wees geseënd. C

  • Ons bly by die see. Permanent. Elf maande en twee weke van die jaar is die strand verlate, die vakansiehuise leeg. En dan verskyn die GP-nommerplate, vreemde honde, die bote en die spierwit lywe. Ons is bly daaroor. Nie net omdat die plaaslike snoepie sy hele jaar se wins in veertien dae maak nie, maar omdat ons die natuurprag waarvoor ons elke dag dankie sê kan deel. Dis lekker om mense hulself sien geniet, vry asemhaal, sandkastele bou, vroegoggend alleen langs die see gaan stap. Jou gediggie bevestig dit als.

  • Powerful motivation that speaks right to the core of one’s soul.
    Dit is presies, presies hoe ek, tot in my binneste, voel. Pragtig.

  • Ek glo die natuur se olie en salf het hierdie vakansie die gewensde kure bewaarheid. Mooi verwoord.

  • Wie’t vakansie nodig … wanneer ‘n mens met soveel digter-inspirasie aangevuur word … om hierdie lewenstog aan te durf … of tot die volgende Desember-vakansie uit te hou, of eerder om weer deur ‘n vakansie-gedig vernuwe te word.
    Bravo!

  • Corne Volschenk

    'n Sielsgebonde, tasbaar-vereenselwigbare verwoording van 'n tyd van verkwikking met soveel betekenis vir ons as Suid-Afrikaners. Ek hou bitter baie van:
    “my hoopverlore hart
    opmerksaam olie
    met gesellige samesyn”.
    Jou talent beur voort Willem, bly begeesterd.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top