Antoinette Klein deel haikoes wat sy die afgelope anderhalfjaar in Poznań, Pole geskryf het.
bosse papawers
padlangs vlietende rooi streep
lens se sluiterspoed
dagbreek skud sy serp
voëls van baie vere
fladder orals uit
die goukou se blou
loop met vroegdag se lig oor
oranje strande
die gul vensters vol
oggendoonde pak baksels
op ou tafels oop
die laaste son vleg
skaduwees plasse koeltes
bolla die donker
die paynesgrys wolke
lek kombersdig bietjies reën
die tuin skep asem
duiwel-in-die-bos
die koringblom in die son
een verbleik een blou
duiwel steek pyp op
branders kook ’n storm los
wolke vol gerook
duiwelsgesiggies
blom vrolik die wêreld vol
doring in my vlees
flenters berigte
krys oulaas in die takke
saktyd vir die nag
franschhoek se massas
dog-roses dwarrel spierwit
straataf konfetti
geure en kleure
vars oor die tafel gestrooi
die ene monét
hier langs die slaapplek
tik iets of iemand iewers
vivaldi wakker
kierie-krom loop sy
rank klein tussen die mense
bokant hulle uit
kwikkienes gestroop
ingeryg aan doringtak
janfiskaal se spens
’n misreënoggend
op die rug van ’n ruspe
lê druppels silwer
nuwetyd se oes
druiwetrap en terpentyn
hang teen die wit mure
oplaas opgeruim
herfs se laastes die eerste
skoenlappervlerke
ou goëlaarwindjie
bokkoms fladder vrolik ry
op ry balke langs
pers laventelbos
somer se towenaar strooi
massas skoenlappers
pirouette plié
goor pantoffels punt oulaas
arabesque vole
reën skryf teen die ruit
’n oop sambreel lees rustig
die hele boek deur
rooiwyn laat verlang
bietjies langbeen bietjies mors
oor die hart se rand
skemer se disprin
los donker op in die nag
helder blink sterre
skielik ondervoets
rank suurlemoenmalva in
chanel nr 5
so langs die warta
herfsblare val fyn vlerkies
charon se stil tol
somerdroogte broei
’n bosbok drink bakhand uit
die tuin se hol klip
teen die stoep se hoek
bol westewind hou hom vas
yler as pyprook
vroegdag kim se naald
bontgelapte horison
paradysdag kwilt
windstil voor die reën
uit volgepakte wolke
knoop ’n reënboog oop
wintervure vort
skoorsteen eindelik weer vry
ooievaars kom nes