Haikoe-kompetisie: 52 haikoes deur Johanna Fourie

  • 1

 

skrik in my blink gang:
gestreepte sjongololo!
hadidas ha-ha

 

nat en sleepselglad
lê sy spoor op slakkepas
wegkom kan hy nooit

 

stukkies stof dans rond
gevang in skewe sonstreep
koud en weg daaruit

 

vreemd die tweevoetval
lowergroen stilte hang klam
bedek skugter-vlug

 

ongesteurd seil hy
swart en glad van tak tot tak
misken voël-angs

 

gewyde bosuur:
katedraal se lig gedemp
deur klam lowerspel

 

warm-rooi tong verteer
voete vlug, trane verblind
struikelval verward

 

gras lê swart veras
druppels sug-plof huiw'rig neer
pols lewe terug

 

grassade buig skeef
voor die aanslag van die wind
knak is nié bly leef!

 

poeletjie water
muskietlarwes kleef vergroen
môre droog gebars

 

druppels verwasem
om hierdie keer te ontduik
aan wegsyfering

 

lemoenbloeiselgeur
aangedra op aandroering
laaf snikhete dag

 

winterverstarring
deur reën en son ontsluit
kleur en geur bars los

 

skulpie op die sand
jy’s blou of groen of net waas
requiem vir wat?

 

gesperde kake
in groen seedieptes klap toe
skool vis skoonveld weg

 

seegolf op seegolf
maal en draai en kolk tot kom
beef van een skuimbol

 

wriemel tevergeefs
soutlyf spartel blink van see
glans vervloei in net

 

kat op in die boom
hond tjank en blaf om baasskap
fataal, so gegrond!

 

grasnessie gevleg
eenvoudigste van als – dáár
strooi die son sy goud!

blaartjies wikkel-dans
kielierig saam met windvlaag
wat tart sonder skroom

nat-glad glip miswolk
tussen rotsvingers deur – hang
stuk-stuk uitgepluis

toktokkie spartel
en spook al bo-oor die klip
weet hy nie van óm?

met rooiswart vlerkstrek
klink sy vlugroep skor en kru
Loeriemaat skuil sku

kaal van blom en blaar
gryp sy tak uitgedor na
gans nuwe seisoen

windgeweld vergeefs
blom en blaar klou wortelvas
aan knol diep gegrond

bosreus gehard en
taai ril en beef teen die kap
en swaai van die byl

paar-paar uitgestrooi
wit-en-blou, groen-en-rooi g’n
plek vir een alleen

bont kapokhaan kraai
met vlerkklap sy koningskap
vroegdag opgekerf

droewig roer die wind
deur die droë dor lug – waar is
al die wolke heen?

druppels hang geklok
luid bars voël-eufonie los
en die son lag saam

byltrillings? dit kom
van daar onder af – hier bo
is tog geen gevaar?

wolke maal en grom
sonder asem wag die wind
druppels plof in die stof

waterval bruis ’n
miswasem wat lowergroen
varings laat rondtas

blare skarrel-vlug
tussen windvlae stof wat
nie mooi weet waarheen

 

snikhete middag
vou sy loom kombers oor pomp
en dam – rimpelloos

skop hoog agterop
miskruier se wikkeldans
miskoek moet mos rol!

droewig kring die wind
al soekend om elk hoek – waar
glip die wolke heen?

blink gryp ’n druppel
dou die vroeë môreson
vir ’n oomblik vas

hondjie vol van pret
grom-blaf om jou eie stert!
Het jy dan geen end?

nessie waai en swaai
wind ruk en pluk skoon verniet
grasvlegseltjies klou

swart en blink glip sy
gladde lyf, krul met gemak
al sáám met die tak

lentetooi is hier!
wit en pers en pienk gestrooi
kosmos-konfetti

margrietjies bont-mooi
droom gesig na die son – teen
môre flets verlep

sonstrale heel vroeg
omtower spindraadjies fyn
tot dou-reënbogies

zoem al op en af
zoem sy laaste kragte uit
neus vas teen die ruit

wyd en stil die stroom
krans en klip perk in – verskeur –
tuimel bruisend neer

laatdag smelt weg tot
rooi en pienk en pers en blou
nag strooi maan-as uit

bloekom gegrof van
stam en blaar gooi skadu oor
graf in melkwit nag

duifie spring sywaarts
kraalogies verstar – stukkie
koek vertrap tot gruis

swael gemanel
vlug voor die winterkou of
jaag die somer na?

geelvink ken van raas
en uitmekaar pluk nog voor
’n blaar weet van val!

golwe ru en rof
gryp en gier oor elke rots
glip glad-skuimend terug


Teken in op LitNet se gratis weeklikse nuusbrief. | Sign up for LitNet's free weekly newsletter.

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top