Foto: Canva
Hadida
Daar waar die skril
hadida die lug beset,
het ek vergifnis
gaan soek;
'n verontskuldiging
vir die lieg
waarmee ek jou laat glo het
dat ons somer saam
nie saak gemaak het nie.
Maar die skreeuende
grootbekvoël
het vir my gelag;
van my soektog
'n bespotting gemaak.
Wat oorbly, is net grys –
die verwronge onthou
en die wete
dat die bekkige kreatuur
ook in 'n saamgeflanste
winter heers.
Hy verkondig luidkeels:
Somer is verby.
En jy daarmee saam.