Foto: Unsplash.com
Gegroet, my hinterland
Windverweerde gannabos
Tolbos deur die wind teen die draad gelos
Voetpaadjies deur die boesmangras
my blik streel die horison en ek wonder
oor my spore wat hier was
By Niekerkshoop, Groblershoop
En Kakamas
Waar draai my gedagtes vas?
Loop jy die stofpad na Copperton
of ry jy donkiekar na Warrenton?
Hier het ek myself geword
Geboortegrond en bakermat
Dankie Heer – niks kom ek kort
By Bakenberg en Grootdrink
Daar is die lewe breed vir my ingeskink
hierdie droë vlakte maak my gedagtes vry
Heimat van my voorgeslag
dis daar waar my hart eens vlerke kry
In die aand kyk ek op na die wye Karoonag-hemel
waar die aarde se helderste sterre wemel
Ek stuur ’n gebed na bo
daar is net een ding wat ek vra
Heer – hou dit vir ewig so
Gegroet, my hinterland!