Gee my jou hart as nagereg

  • 0

Titel: Gee my jou hart
Outeur: Kim Bock
Uitgewer: LAPA
ISBN: 9780799342864
Bladsye: 352
Formaat: Sagteband
Prys: R125

Klik hier om nou Gee my jou hart van kalahari.net te bestel!

 

In Afrikaanse literatuur het ons 'n lang tradisie van sogenaamde ou-Kaapse verhale of Kaapse romanses. LAPA-uitgewers se Romanza-reeks spog met 'n afdeling vir publikasies wat spesifiek onder hierdie subgenre (Kaapse romanses) val, soos Gee my jou hart, Kim Bock se eerste boek in die Romanza-reeks.

Reeds die omslag van Gee my jou hart berei die leser daarop voor dat hy of sy hier iets stroopsoet te wagte kan wees: 'n pers agtergrond, groot pienk letters en 'n jongedame met oë wat die kyker agter lang wimpers ontwyk. Daarteenoor die skraal skouer: tergend en sensueel bo 'n lae hals. Oënskynlike onskuld en sensualiteit is 'n smaaklike kombinasie in die romanse-resep wat in hierdie verhaal ontplooi word.

In 'n Nederlandse weeshuis sien die skone Claudine D'Ailly 'n advertensie van die Kaapse vryburger Markus de Waal. Markus wil 'n vrou hê en Claudine wil 'n nuwe lewe hê. Sy reis na die Kaap en word die bruid van dié vooraanstaande en aantreklike boer, maar besef gou dat hy nie aan liefde glo nie - Markus het hom met haar in die eg verbind slegs met die hoop op 'n nageslag.

Vir 'n liefdelose huwelik sien Claudine nie kans nie, selfs al maak Markus ongekende, sensuele gevoelens in haar wakker. Reeds met die eerste oogopslag is laasgenoemde verwarrende effek op Claudine duidelik:

'n Vreemde rilling glip teen haar ruggraat af en gedagtes begin deurmekaar in haar kop rondtuimel.

Lank en lenig, sterk skouers, smal heupe, 'n bruingebrande vel en geheimsinnige grys oë: Markus de Waal is die vergestalting van die romanse-held. Daarteenoor is Claudine ook 'n tipiese romanse-heldin: 'n vrou uit eie reg, maar steeds kwesbaar, soms naiëf en altyd, maar altyd beeldskoon.

Markus vind vir Claudine onweerstaanbaar vanweë haar fyn gelaatstrekke, roomwit vel, noue middel en jong borste wat bo die wit kantkraag van haar rok uitdein, maar sal hy haar ooit kan liefkry?

Dié moontlikheid vervaag nie slegs as die geheimsinnige Markus te kenne gee dat gebeure in sy verlede veroorsaak het dat hy geloof in die liefde verloor het nie, maar veral ook wanneer Isabeau Laurent, die jong, snipperige weduwee van die buurplaas, haar opwagting maak. Sy is natuurlik ook pragtig, selfstandig en klaarblyklik Markus se beste vriendin.

Met perde, koetse en 'n swaardgeveg op die koop toe, maak bostaande intrige Kim Bock se Gee my jou hart 'n kenmerkend Kaapse romanse.

Alhoewel Gee my jou hart daarin slaag om die liefde en begeerte sentraal te laat staan (soos dit immers by 'n romanse hoort) en die leser terug te voer na 'n vervloë era, hinder enkele dinge hierdie leser.

Een van die hinderlike aspekte is die redigering. Die lagduiweltjies dans byvoorbeeld net alte veel in die oë van karakters en woorde soos beslis word beslis te dikwels in nabye tydsbestek gebruik (vergelyk p 93 en p 95). Sodanige foute versteur die gemaklike lees van 'n teks. Origens sluip slordige taalfoutjies plek-plek in, soos die volgende reël (p 154):

Vark se kinders besluit hulle het nou net mooi genoeg gehad het.

Dis hier waar ek effens geïrriteerd raak, maar tog steeds aanhou lees, want ek hou van Claudine: sy is mooi, sy het die potensiaal om uit te styg bo slegte omstandighede, en haar begeerte aan en hoop op ewigdurende liefde spreek tot die soortgelyke begeerte van die meeste lesers. Wanneer Markus hom uitspreek teen die liefde en haar meedeel dat hartstog en kameraadskap vir hom genoeg is, is Claudine se ferm antwoord:

"'n Huwelik moet tog op 'n vaste fondament gebou word, en sonder liefde is dit nie moontlik nie. Die intimiteit en kameraadskap waarvan jy praat, sal volg as daar liefde in die verhouding is."

Die hoop beskaam nie.

Indien jy uitgebreide karakterontwikkeling en diepsinnige eksistensiële temas te wagte is, moenie hierdie liefdesroman lees nie. Maar selfs al is eksistensiële temas jou kos, kan 'n Romanza-boek soos dié een ten sterkste aanbeveel word as 'n poeding. 'n Smaaklike, soetsappige, hartstogtelike, pienk poeding.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top