Ek sien God
Ek sien God, in oopmond skater
en die onskuld van my kind
Ek sien God, in ’n naelstring
wat fetus en ma verbind
Ek sien God, in klein sub A’tjies
wat haasbek leer en tel
In Koos Doep se ou gebede
wat hoendervleis op my vel
Ek sien God, in lentebloeisels
wat in perskebome bot
Ek sien God, in Langenhoven
se vers van kers en mot
Ek sien God, in grond wat klam ruik
na die fynste druppels reën
Ook in Ma, wat vir die buurvrou
’n koppie koekmeel leen
Ek sien God, in wolkomberse
as die winterwinde woed
Ek sien God, in die taai stroop
van ’n lietsjie suikersoet
Ek sien God, in vissermanne
wat toustaan vir hul lone
Dan in Ouma se tuisgebakte
warm brood en kerriebone
 |
 |
 |