Litnet

Kobus,

Daar’s eenvoudig geen krag agter jou eentonige intellektualisme nie want jy bulder jou naakte haat soos ’n muur vas teen andersgelowiges en ongelowiges.

Jy deel nie die Waarheid in vrede en liefde met ander nie - nee, jy bliksem "die leuen" asof in ewige kruisverhoor gegrond op jou eie veronderstellinge uit jou medemens.

’n Hater is iemand wat hul tyd en energie spandeer om ander klein te laat lyk sodat hulle groot kan lyk. Kobus, jy het dit nou reeds oor en oor bewys - haat is na al die jare die hoofsaak wat oorgebly het danksy jou op die werf ...

Nietemin, elders (https://www.litnet.co.za/Article/darwinsime-se-archaeopteryx-achilleshiel) tik jy in een van jou woernale aan Angus die volgende: "Angus, jy moet onthou, regslui weet hoe om met deskundige getuies en getuienis om te gaan – die getuienis is nie ons eie nie en hoef ook mos nie te wees nie – maar word deur ons aangebied komende van deskundiges self. Ek kan sien dat jy heeltemal onkundig is met die hantering van deskundige getuienis. Dus, dit is glad nie nodig vir my om die dinge wat jy vra, te doen nie – jy het reeds die inligting, vir jou verskaf vanaf kundiges op die gebied. Dus, jóú metodiek laat veel te wense oor. Nou ja, jy het nou jou tyd gemors – in stede dat jy aanvaarbare weerleggende (sic) getuienis aanbied wat nie hipotese is nie, kom jy met die nonsens hierbo."

Kobus, dis werklik interessant.

Ek’t jou nog altyd gemaan oor die kammahof wat jy op die werf poog. Dis asof jy jou verlore glorie probeer herwin na jou skraping van die rol vir eerbare prokureurs.

Natuurlik kan jy jouself as martelaar verhef jeens my voor die gees laat kom van jou dwalinge in die regte lewe. Maar laat asseblief jou hardvogtigheid net vir ’n oomblik en dink aan die geldigheid van my veronderstelling.

Met alle respek; as grootmens verstaan ek dat jy iewers erge trauma in jou lewe ervaar het en nou jou toevlug in enge rasionele denke probeer vind.

In die regte lewe het ek ook te doen met iemand wat deur sy eie nalatigheid (en dié van sy vrou) hul driejarige seuntjie in ’n swembad sien verdrink het. Hul seuntjie was een van ’n tweeling en die dogter is vandag ’n jong getroude vrou.

Die traumatiese ervaring jeens die verlies van hul kind jare gelede terug het hierdie persoon in ’n gewetenlose geldmasjien omskep. Die Bybel is nes joune ook sy wapen.

Hulle open hul besigheid elke oggend met skriflesing en gebed en neem slegs Christen-naïwelinge in diens. Hulle huiwer nie om te lieg en te bedrieg onder ’n dekmantel van Christelikheid nie. Hul bedrog behels miljoene sonder saak met die publiek se gesondheid en veiligheid. Soos jy dalk weet beteken sulke gedrag ’n skedule ses oortreding. Na ’n lang uitgerekte ondersoek voer hulle heel moontlik hul bediening voor die einde van jaar in die tronk.

Ek noem dit sodat jy kan weet dat ek heelwat ervaring van mense in die regte lewe het wat met ’n Bybel onder die arm skaamteloos lieg en bedrieg om geld te maak. Hierdie mense is "nooit skuldig" aan iets nie en plaas alle verantwoordelikheid en skuld op almal om hulle - hulle is dan uitverkore gelowiges - kyk net met hoe baie geld is hulle dan geseën ... en die wonderwerk hoe ander verblind is sodat hul dade ongesiens vir jare verbygegaan het ... wie kan daarteen stry?

Jy kan seker aflei dat ek ook soms tyd in howe en kommissies deurbring. Lees ek dus jou herinnering omtrent regslui se rol in die hantering van getuies en bewyse aan Angus, sien ek jou onreg as aanklaer duidelik op die werf.

Die werf is eenvoudig nie ’n hof of kommissie waar jy jou rede op grond van aanklag- regter- beskuldigde kan voer nie.

Tensy ... en hier is my voorstel; bepaal jy wie die kommissaris/regter/jurie sal wees, wat die aanklag is en in watter kategorie jy as aanklaer jou getuies en bewyse plaas (byvoorbeeld hoorsê getuie/ooggetuie/vyandig ens ...). Ek sal namens die verweerder/respondent/aangeklaagde argument voer.

Kobus, ek nooi jou op jou eie terme in jou eie kammahof om jou saak op geordende wyse te voer.

Jou amigo in Adam,
Cornelius