Litnet

Foto: Canva

Dood slaat nou die til, my lam

voete vertel stories
van kloppende trosse are,
gegroefde hakke:
’n dubbele voos versugting

ek vryf Eight Hour Cream
aan ingesonke brûe
die eelte, die ingroeinaels
sê jammer oor die verlore Sondae
die vergete Green Cross in die kattebak
die Checkers voucher en die Romany Creams

maar haar oë kyk klaar anderpad:
want dood slaat nou die til, my lam
steek die kleingeld in sy sak
klap sy gladgeskuurde hakke
systap my vraende palms
roep ongeduldig: Next!