Askies, jammer maar hier’s ek weer
Na meer as honderd kon ek sweer
Ek is klaar gerym
Niks oor in my kleim
Maar politici se snaaks moet mens vereer
ANC
Andile was net bloot naïef
“ʼn Ramaphosa is geen dief
Bosasa wou gee
Ek sê moeilik nee
Stem steeds vir Pappie hy is kief”
Duduzana in die hof oor sy ongeluk
Wou nog die Porsche se stuurwiel pluk
Die taxi spring voor hom in
Hulle ry mos so sonder sin
Hy: Onskuldig deur die impak vasgedruk
En as ESKOM net wou luister
Was ons beslis nie in die duister
Zuma het tog gesê
Hy wil kernkrag hê
Maar almal wou net koste fluister
En volgens minister Blade is dit bloed
Wat die alkohol dwing tot spoed
Maar hulle sal almal vang
Maak al wat vampier is bang
Beduie Nzimande met ywerige gloed
Sars se nuwe baas, ene Kieswetter
Sal als herstel volgens die gekwetter
Almal sal nou kak en betaal
Anders kom Edward jou haal
In sy hande gaan jy les opsê, jou wetter
Daar gooi SANRAL handdoek in
Hulle het lank en wyslik besin
Om nou te prosedeer
Maak by die stembus seer
Ná 8 Mei sal hulle weer begin
Jesse sê bekommerd oor Luthuli-huis
Seksuele vergryping is heeltemal tuis
Nie net mans stook
Sommer die vrouens ook
Met soveel mag bly net die sterkstes kuis
Soos dit graag-reisende politici betaam
Moes hulle self gaan kyk voor hul kon beaam
Venezuela vaar goed
Hulle voorbeeld gee moed
Amerika behoort hulle vir fopnuus te skaam
Ten minste het SA meer gereeld lig
Oor die ander probleme is die ANC dig
Chavez en Maduro is groot
Al roep hul volk kort-kort vir brood
Sosialisme is die antwoord het hul berig
Die etiese komitee sal finaal besluit
Wie behoort in en wie hoort uit
Dit het die NEC beloof
Hou vas aan jou geloof
Vat ons woord en moenie muit
En daar noem die manne van etiek
Die name van leiers van die Republiek
Gwede en David en nog
Maar nie vir Ace: vergesog
Vergeet dit als: net ʼn verkiesingstriek
Mashatile, die party se geldgeneraal
Meen die verslag was bloot verbaal
Dis alweer die pers
Met ʼn rokende kers
Wat niks tot nuus probeer vertaal
Wat is dit tog met Cyril, onse hoop?
Hy praat dan anders, hy het verloop!
Hy’s politikus, mens!
As jy als glo is jy kens
Wat jy ook al dink, hy moet stemme koop.
Koning Ace
Hou jy ʼn adder na aan jou bors
Byt dit jou annie keel, dis maar wors
Vat nou maar vir Ace
Al lyk hy soms kuis
Dis als vernis, bloot ʼn papierdun kors
Ace, Ace Ace, die Vrystaat se ystervuis
Welkom in Mister 10% se paleis
Die provinsiale kas
Red gereeld sy bas
As hy geld gee aan man, vrou en muis
Ons gee vir onverwagse gaste Glen-tee
Maar Ace koop stemme met Glen se vee
Gepos as die provinsiale landboubaas
Het sy terugveg almal verbaas
Hy weet mos hebsug sê nooit vir ʼn geldjie nee
Mister ten percent vat net kontant
Kak of betaal is die wet van sy land
Hy help net waar hy kan
As jy deel volgens plan
En jou siel aan sy netwerk verpand
Om geld te vat, is dalk polities gewens
En as jy dit deel, is jy dalk ʼn goeie mens
Maar lieg oor jou struggle creds
Dan kort jy wragtag baie meds
Want die ware veterane weet jy’s kens
Juju
En wat eintlik vir Julius laat hang-tong:
Witmense se honde eet steak en biltong
Mediese fondse vir honde
Is ʼn helse groot sonde
Dit maak hom kwater as vir King Kong
Malema weet verseker en sê dit kwaai
Afrika se geskiedenis word verdraai
Sjaka is bloot ʼn gerug
Gaan in die verlede terug
Daar is net beeste opgepas en gesaai
Volgens Julius se geskiedenis-onthou
Het net die Europeërs Afrika geknou
Die slawe sou tot by die kus loop
Arbeid vrywillig aan skepe verkoop.
Kan jy iemand met so min kennis vertrou?
Verstaan tog die EFF gebruik innuendo
Met skimpe jaag hulle twyfel tot crescendo
Wie het feite nodig?
Emosie maak dit oorbodig
Als is bloot ʼn speletjie soos Nintendo
Snaaks dat Julius en Steve dit nie wis
Dat hul eintlik van dieselfde kraal is
Beide wat die geskiedenis plooi
Om elk die anderkant te looi
Elkeen is alleen reg, die ander ʼn rassis
Steve
Vir Netwerk24 en Toyota is dit soos dood
Net sonder Steve steun hul Afrikaans is Groot
Ons haat sy politiek
Daarom trap ons briek
Siembamba-mamma-se-Steve-in-die-sloot
“Ons doen dit vir ons verdeelde land
Die maatskappy is nie aan Steve se kant”
En al verskil ek van sy politiek
Wonder ek oor die metodiek
Is dit nie amper soos om boeke te brand?
Die Land word ter elfder ure verbied
Deel in die Goemas puur verniet
Dis oor Steve se portuur
Dit lyk soos sensuur
Wonder wie besluite so hiet en gebied?
En Die Land is tog ʼn te mooie lied
Wat blykbaar net vir blank ʼn plekkie bied
Een swartman so effe agter
Die blou overall is tog sagter
As donners in rooi wat wil veg en skiet
Maar Steve moes besef dit kom
Hy slaan dan self dié soort trom
U2-kaartjies in die Juksei
Die Iere het ons Boere verlei
Bevrydingsliedere! Hulle dink ons is dom
Die res
Facebook-Vytjie met die Bybel en ʼn sny koek
Van nou af veg sy in die ACDP se hoek
Diep in geloof
Het hul beloof
Hul hang, stenig en kastreer elkeen wat kroek
Om ʼn eerlike party te kry is ʼn las
Maar Jimmy Manyi het een wat pas
African Transformation Movement
Dis duidelik ʼn improvement
Die akroniem ATM, vir hul wat vat, gepas!
Mmusi, Mmusi, hou tog droog jou doek!
Nog ʼn baba toe die ANC vryheid soek
Mense wat staak en brand
Gee hul uiteindelik die land
Jy is nog so jonk, jou klagtes vat die koek.
Op die trappe van die konstitusionele hof
ʼn Tafel vol wit, bruin, en swart (effens dof)
“Ons moet protesteer
Ons wat goed regeer
Dit wat die ANC (weer) doen is onbeskof!”
En wrintiewaar Antie Pat prosedeer
En wen waaragtig nog ʼn keer
Die DA het gelieg
Moet in die openbaar bieg
Sy’t self geloop, sy’s nie gereduseer
Kommentaar
Robert, Robert, eers het ons jou gehaat
As ons jou innie straat kry sou ons slaat
Maar nou klik jy mooi
Laat lekker sterk looi
Jou sonde vergewe wyl ons daarby baat
Robbie was voorheen die duiwel se bruid
Maar nou dring ons aan: los hom uit!
Hyself is die dapper wag
Teen almal wat verkrag
Soldaat teen ongeregtigheid wat jy nie stuit
En gode sy gedank vir Shabir
Voorheen dodelik siek op papier
Heeltemal genees
Hoe kan dit wees?
Onaantasbaar die Indiese Fakir
Wat’sie verskil tussen vryheid en haatspraak?
Is dit woorde, konteks of bloot net wraak?
One settler one bullet
Dis ou lirieke, cool it!
Maar as jy wit is, laat alles die ys kraak
Aan alle kante het ons nou aktiviste
Dronk op eie opinies, soos alkoholiste
Net ek is reg
Weg met jou, weg!
Ons is vryheidsvegters, julle terroriste
Die ironie is uiteindelik al wat bly
Soos elkeen in sy eie braaksel gly
Met vinger in die oor
Kinders wat nie wil hoor
Debatteer kan ons nie, net stry
En êrens wonder ek oor die stront
Alkant baklei oor verdomde grond
Meeste bly in stede
Dalk om goeie rede
Want om te boer kos sweet by die pond
As jy steeds wonder hoe om te stem
Daar is ʼn formule wat jy moet tem
.25 persent van die totaal
sal jou ʼn sitplekkie behaal
minder as dit en jy is gerem
Voor jy finaal oor jou kruisie besluit
Werk tog die hele moontlikheid uit
Indien agtien miljoen sou gaan merk
Is jou keuse veertigduisend sterk?
Indien nie eindig jou kies sonder duit
En deur dit alles sien bykans niemand raak
Honderd brand hier, duisend wat daar staak
Die meerderheid sug
Dis teater, ʼn klug!
ʼn Toekoms vir ons en ons kinders is al wat traak
Meesal Christene, sê die sensus oor ons
Maar moenie dat Evangelie jou bedons
Hê jou vyand lief
Vergeef selfs die dief
Is woorde vir ander, nie vir myne en ons