Litnet

Beide Angus en Chris waag hulle weer aan die integriteit van die Woord so sin die Bybel opgeteken.

Angus raak ’n spul snert kwyt oor Moses met horings en dan raak hy verlore in die antagonistiese retoriek rakende die ontstaan van die Bybel, deurvleg van sy eie agnostiese mistastinge en wanvoorstellinge. Die resultaat is dan wat ons verwag van so iemand – ’n spul oningeligte, insiglose snert.

Chris kom weer en haal die een sekulêre teoloog na die ander aan en probeer die Persoon van die HERE Jesus Christus verdag maak. Die pogings het geen meriete nie en hulle verteenwoordig maar weereens net sienswyses van Bybel antagoniste.

Uiteraard word hierdie agnostiese en sekulêre bronne en skindertonge sorgvuldig deur die twee ateïste uitgesoek om hulle obsessie oor die Woord te probeer voed deur die Waarheid te onderdruk.

Chris se persoonlikheidsvergelykings tussen Bybelse apostels en evangeliste en ander onbekende persoonlikhede, is van geen waarde of konsekwensie, nie. Die feit dat sommige mense persoonlikheidsooreenkomste vertoon, laat hulle nie hul oorspronklike identiteite verloor, nie.

Hierdie metodiek van die deursnee agnostikus soos nou weer deur Angus en Chris aangewend, is natuurlik niks nuuts nie. Dit is ou, holruggeryde metodiek wat al letterlik vir eeue aankom. Sedert die HERE Jesus Christus se bediening op aarde meer as tweeduisend jaar gelede, is daar konstante en volgehoue aanslae van agnostici en sekulariste om die Woord soos in die Bybel opgeteken, te diskrediteer.

Het dié aanslae teen die Woord enigsins geslaag? Hoegenaamd nie. Die teendeel blyk. Die geskiedenis wys vir ons dat die Woord gedy het onder dié aanslae. Die feite toon aan dat die einste Bybelboek, wat só deur die agnostici aangeval word, die mees dinamiese Boek van alle tye, is. Daar bestaan nie ’n publikasie op aarde, histories en verál vandag nog, wat die distribusie syfers kan ewenaar van juis die Bybel, nie. Daar is geen ander boek wat op aanvraag in soveel verskillende tale vertaal is, nie. Daar is geen boek wat op só ’n skaal vrywillig (anders as, byvoorbeeld, die Islam waar dit verpligtend is om ’n Koran aan te hou, nie) en met groot ywer, aangeskaf word nie.

Niemand kan dié Boek weerstaan nie – verál nie die agnostici, nie - hoe ironies is dit nie, dit is veral húlle by wie jy feitlik elke weergawe van die Bybel sa aantref. Hoe dan so? Juis hulle probeer dan die inhoud van dié Boek so afkraak? Van hulle, soos Chris, is selfs bereid om te erken dat hulle ’n obsessie oor die Bybel het … wat is dan so anders aan dié Boek dat die Inhoud daarvan só ’n enigmatiese houvas op self die felste antagoniste daarvan, het, vir eeue al?

Die Bybelboek is só dinamies dat dit Hollywood noop om juis Hollywood-styl oor dié dinamika flieks te maak, soos byvoorbeeld die kontroversiële The Book Of Eli (niks met die profeet Eli te make, nie, maar is die naam van die hoofkarakter wat uitstekend deur Denzel Washington vertolk, word) met ’n uitstekende rolverdeling en wat handel oor die ongekende krag en dinamika van die Bybelinhoud op verkillende vreemde maniere vir verskillende mense.

Waarom is die Bybel dan so ongeëwenaard en ongekend gewild en gesog ten spyte van soveel ononderbroke eeue lange kritiek en aanslae?

Daar is ’n baie goeie rede waarom dit só is. Dit is omdat die Bybel die geopenbaarde, geïnspireerde Woord van God bevat. Dit is omdat die Woord-inhoud ewig dinamies is, Lewend is, soos géén ander boek, nie. Die Bybel waarin die geopenbaarde, geïnspireerde Goddelike Woord as sulks opgeneem is, weerstaan en oorkom álle aanslae daarop, juis omdat die Woord vol Krag en Lewe is. Die Woord in die Bybel is verbysterend.

Dat die arme antagoniste se pogings bog is, behoef nie gedetailleerde bespreking, nie. Na ál die jare, die eeue, is dit eintlik pateties. Hulle kon steed geen vordering maak sedert hulle voorgangers se insigloosheid, nie en kan steeds nie die groef waarin hul vasgevang is, ontsnap, nie.

Die Bybel is die eersteklas getuienis van mense wat ’n persoonlike verhouding met die HERE had. Paulus is só ’n man wat ’n persoonlike ervaring en uiters hegte verhouding met die HERE van die Bybel had, welke verhouding begin het op pad na Damaskus op ’n dag toe hy wat tóé Saulus geheet het, juis gegaan het om gelowiges van die HERE te gaan vervolg, omdat hy, nes die Chrisse en Angusse vandag, gedink het die evangelie van die HERE is versinsel. Só ook ander wie vir die opskrywe van die Woord verantwoordelik, was. Nie net is dié mense deur die Gees van God geïnspireer nie, maar hulle is kontemporêre van die HERE Jesus Christus en die onmiddellike tyd ná SY opstanding en hemelvaart.

Lukas het ook toegang tot die HERE se moeder, Maria, gehad met wie hy kon praat oor die HERE en ook met ander kontemporêre wie saam met die HERE was. Daarom is die versinsels wat Chris nou aan Lukas se evangelie wil toedig, niks anders as sinnelose kwaadwillige verdigsels en grondelose spekulasie, nie.

Maar nie almal verstaan die Woord nie, omdat hulle harte en sinne weens karnaliteit en wêreldsheid stomp geword het (Romeine 1:18-25), ten spyte van hulle obsessie oor juis die Woord. Hulle het kontak met die openbarende Gees van God verloor en selfs verbeur. Dit is te wagte, want die HERE van die Woord wat hulle so insigloos en sinneloos probeer kritiseer, het al destyds, meer as tweeduisend jaar gelede, geopenbaar waarom dit met hulle só is (Mattheus 13:13-15). Maar waarom die slegte gesindheid oor juis dít waarvan hul nie kan ontsnap, nie? Waarom bly hulle juis die Woord kritiseer terwyl hulle obsessief met die Woord is? Omdat hulle aan hulle eie slegte gesindheid oorgegee is deur die HERE (Romeine 1:28).

Daarom is die antagoniste vandag steeds vir ons die toonbeeld van betroubaarheid van die einste Woord, soos die Woord meer as tweeduisend jaar gelde al geopenbaar het jeens hul optrede en die sielkunde daaragter (daar was hoegenaamd nie sielkundiges destyds, nie), presies soos ons dit vandag sien uitspeel met hulle.

Angus gee in sy insigloosheid allerlei self uitgedinkte redes waarom die Bybel kwansuis destyds van mense weggehou, is. Hy praat snert. Die Bybel is weggehou van mense omdat die Katolieke kerk van destyds hom aan die mens vergryp het weens hul onkunde. Daar was allerlei ontoelaatbare stelsels in plek, waarvan die afkoop van sondes deur betaling van geld aan die Katolieke fiskus die berugste is. As die mense toegang tot die Bybel had, sou hulle sien watter vergrype dit aan hul onkunde was en sou in opstand kom. So, dit is juis weens die integriteit van die destydse Bybel, dat die Bybel van die mense weggehou is, want só is die Waarheid daarin vervat óók weggehou. Hierdie sweer het eers oopgebars toe Martin Luther in 1517 sy 95 vergrype-klagskrifte oor die Katolieke kerk van die tyd se praktyke rondom doop en afkoping van sondes op die All-Saints kerkdeur in Wittenberg gaan vasspyker, het. Dit was die begin van die openbaring van Waarheid. Luther was daaroor vervolg deur die Katolieke kerk, maar het ontkom.

Maar hierdie tipe vergrype het die grondslag gevorm vir die Katolieke kerk se weerhouding van die Bybel aan alle mense en nie die snert wat Angus in sy absolute kwaadwilligheid en onkunde kwytraak nie.

Chris kla weer dat die Woord nie ’n ‘duidelike’ prentjie gee oor die relevansie van die HERE se kruisigingswoorde aan die veroordeelde langs Hom oor die paradys, nie en ook nie SY tydelike besoek aan die doderyk, nie. Chris en sy sielsgenote se inperking van begrip maak dat hulle selfs die bestaan van dei HERE, van God, nie kan begryp, nie – totale Spirituele blindheid, presies soos die Woord verklaar en perfek uitwys (Mattheus 13:13-15). Die rede vir hierdie onbegrip is reeds hierbo en soos talle kere tevore, uiteengesit. Maar ook Chris se gebrek aan Spirituele insig en Intelligensie, maak dat hy nie kan begryp hoe die HERE die doderyk én die Paradys in een ‘dag’ kon wees, nie.

Eerstens verwar hy in sy onkunde die doderyk met die hel. Die hel is ’n plek en toestand wat die bestemming is van uiteindelike destinasie van finale veroordeeldes (die tweede dood – Openbaring 21:8) waarvandaan daar geen terugkeer is, nie (Mattheus 10:28; 25:46; 2 Petrus 2:4; 2 Tessalonisense 1:9; Judas 6). Die doderyk is die verwysing na die teenoorgestelde van die lewendes. Van die doderyk is daar terugkeer moontlik, Deo Volente – só is die HERE Jesus Christus die primêre voorbeeld en daar is ook die gevalle van Jaïrus se dogtertjie (Mattheus 9:18-26) en natuurlik Lasarus (Johannes 11:33-44) en natuurlik ook die opstanding van die dode wat met die HERE Jesus se opstanding saamgeval, het (Mattheus 27:51-53) – laasgenoemde as kragtige voorteken van die werklikheid van wederopstanding van die vlees, waarvan die HERE die Eerste opstandeling, was (lees gerus hieroor Johannes 6: 39-40; 1 Samuel 2: 6; 1 Korintiërs 15: 19-23, 35-46 in samehang).

Die doderyk is die versamelterm vir die tydelike destinasie van gestorwenes tot die Oordeel. Daar word gevind die plek waar ongeredde siele in afwagting is vir die Oordeel en daar is ook die ander deel waar die gereddes wag tot na die Oordeel. Hierdie skeidende dispensasie in die doderyk word glashelder deur die Woord verduidelik (Lukas 16:19-31). Soms word daar ook na die plek van afwagting, as die paradys verwys.

Dan verwar Chris ook die Paradys met die Hemel. Die Hemele is die verwysing na die finale destinasie van gereddes ná die Oordeel en die finale skeiding (Mattheus 25:31-46) waar die gereddes ewig sal vertoef (2 Korintiërs 5:1) terwyl die Paradys ’n plek in die doderyk is wat soos die voorportaal van die Hemele is, ’n plak van afwagting vir regverdige gestorwenes en waarvandaan daar, Deo Volente, ook terugkeer moontlik is (Lukas 23:43; 2 Korintiërs 12:4; Openbaring 2:7)

By die afsterwe het al drie die gekruisigdes die fisiese dimensie verlaat en die spirituele dimensie ingegaan. Daarom was die Paradys vir die HERE Jesus Christus, qua Mens, direk na die kruisiging die aangewese plek en het hy die pas geredde mede gekruisigde daarheen saamgeneem, maar as Woord van God, had HY ook geredelik toegang tot die doderyk se ánder kant, waar die ongereddes wag en het HY dáár qua Woord, verlossingswerk gaan doen ten aansien van diegene wat Hom vooroorlede was deur verlossing aan hulle te gaan bedien (1 Petrus 3:18-22; 4:6).

Die HERE Lewe en HY LEWE in en deur SY Woord en Heilige Gees, met Wie ons as ware gelowiges elke dag verbintenis het – daarom dat Sy opgetekende Woord sóveel ongebonde krag en dinamika, het, soos wat algar die uitwerking kan sien soos hierbo na verwys. Alles wat die arme agnostici in hul desperasie om Hom te diskrediteer, selfs SY bestaan te probeer ontken, plaas eenvoudig net meer klem op die absolute snert waaraan hulle gebuk gaan en ons teenstrydige persoonlike ervaring van lewe God, die HERE van die Woord in die Bybel.

Groete,

Kobus de Klerk