Die Uile vlieg weer deur Cor Dirks: ’n jonglesersindruk

  • 0

Die Uile vlieg weer
Cor Dirks
Protea Boekhuis
ISBN: 9781485306313

Cor Dirks was die skrywer van 'n paar reekse gewilde boeke oor Die Uile, Die Otters en Joof. Kinders het veral Die Uile-reeks baie geniet.

Die Uile-reeks vir seuns is ’n paar maal herdruk. Hierin is vyf skoolseuns in ’n bende en beleef verskeie avonture. Die seuns van die bende is Philip die leier, die slim Jorsie, die ronde Vaatjie, die sportiewe Berrie en die hakkelende Hennie, andersins bekend as die Groot Uil, sy adjudant en drie manskappe, en hulle is verbind tot reg en geregtigheid. Hulle bly op die dorpie Kranskop. Die laaste boek, Die Uile vlieg weer, het in 1990 verskyn. Hierin kom die kinders van die Uile bymekaar en volg in hulle pa’s se voetspore. Die Uile vlieg weer is ’n paar jaar ná die oorspronklike Uile-reeks geskryf.

In Die Uile vlieg weer gaan Philip Senekal hoërskool toe op Kranskop. Dit is sy pa se ou skool en hy weet al soveel van die koshuis en die omgewing dat hy uitsien na die avonture wat op hom wag. Maar eers moet hy ook ’n Uile-bende stig. Sy pa was mos darem die Groot Uil van die beroemde Uile-bende. Hy is uitgeknip sy pa se seun. Groot is sy verbasing toe hy sy kamermaat ontmoet – ene Jorsie Neethling, seun van ’n ou vriend van sy pa. Een ná die ander kom die seuns van die Uile op Kranskop aan. Uiteindelik is die bende weer voltallig!

Die boek is interessant en lees maklik. Ek dink kinders, veral seuns, sal baie van Die Uile vlieg weer hou, want dit gaan oor ’n bende wat so pas hul hoërskoolloopbaan in Hoërskool Kranskop begin en gaan probeer om in hul pa’s se spore te volg en ook ’n Uile-bende te stig net soos in die ou dae.

Aan die begin van 2011 het Protea Boekhuis weer Die Uile-reeks begin uitgee:

Die Uile van Kranskop (1950)

Die Uile en die rampokkers (1950)

Breuk onder die Uile (1953)

Die Uile in die wildtuin (1954)

Die Uile in die Kalahari (1956)

Teen die einde van volgende jaar behoort die reeks volledig te wees vir die lesers van die 21ste eeu:

Die Uile en die verlore stad (1957)

Die Uile langs die Limpopo (1958)

Die Uile by die see (1959)

Die Uile in die wapad (1961)

Die Uile in die stad (1962).

Cor Dirks was ook ’n skrywer van ernstiger speurverhale, soos As die galg dreig en Arendnes se moordenaar.

Justus Cornelias Dirks is in 1911 op ’n plaas naby Volksrust gebore. Hy was vanaf 1934 in die onderwys en het in 1973 sy loopbaan afgesluit as hoof van Linden Hoërskool in Johannesburg. Hy was getroud met Elsje van Niekerk en hulle het twee kinders. Hy is in 2000 oorlede.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top