Litnet

As Wouter nie spiritueel blind was nie, sou hy kon sien hoe die skepping van God getuig – hy sou die noodwendige konneksie kon maak tussen die spirituele en die materiële. Is dit nie belaglik dat hy, as spiritueel blinde, dus aangaan met pogings om te stry teen diegene wie wél siende is, wie wél die konneksie sonder enige moeite kán maak nie? Is dit nie belaglik van hom, om te wil stry oor wat hy self niks van weet, nie? Maar hy is maar net verteenwoordigend van ander soos hy.

Dus, hoe kan Goddelike betrokkenheid by die skepping bevestig word, vra hy? Kyk daarna! Kyk en sien, oftewel, verstaan en begryp. Maar as spiritueel blinde kán hy nie en probeer hy nie iets aan sy eie debiliteit doen nie, hy probeer liewer die normale, siende persone se vermoëns verdag maak.

Ek wonder of hulle al ooit die moeite gedoen het, om te probeer om hulle eie debiliteit te probeer oorkom, te probeer evalueer, in stede om normale mense te probeer verdag maak – kan hulle hul dan nie die onsinnigheid van sulke optrede indink nie?

Kyk, ’n mens kan nie vir ’n blinde vertel hoe dit is om te sien, of hoe om te sien, nie – hy het geen verwysingsraamwerk om jou verduideliking in die korrekte perspektief, implikasie en konsekwensie te eien nie. Al wat mens kan doen, is om vir die blinde te vertel wát jy sien, hoe dit werk en hoe dit lyk. Dan kan die blinde jou óf glo, óf op ’n dwaalweg gaan en begin hipoteseer daaroor – en daarmee tree darwinistiese evolusie en groot knal teorie toe. Dit word religie wanneer die darwinistiese evolusionis sy hipotese begin glo vir die waarheid, al hou dit geen verband met die werklikheid nie -  sy eie ‘werklikheid’, dit wil sê, ’n mite en ’n fabel. Dit is dán wanneer die blinde vir jou sal sê dat dít wat jy sien, ervaar en oor getuig, blote verbeelding is.

Net so ook met Spiritualiteit. Al werklikheid wat in die darwinistiese evolusionis se religie te vinde is, is die getuienis van die Skepping wat vir hom uitgespel word – maar hoe dit tot stand kom en deur Wie, kan die darwinistiese evolusionis maar net oor spekuleer en hipoteseer omdat sy spirituele blindheid hom niks anders toelaat nie.

Een van die sterkste spirituele, geestelike eienskappe, is insig en begrip… Spirituele Intelligensie se werktuie.

Daar is natuurlik die unieke hoedanighede soos intelligensie by diere en die superieure menslike intelligensie en hoedanighede waarvoor die darwinistiese evolusionis géén empiriese verklaring het nie. Die evolusionis kán nie vir jou uit sy darwinistiese uitgangspunt bewys hoe en wanneer die dier, byvoorbeeld, aan sy intelligensie gekom het, nie – veral vanuit ’n geheel en al intelligensielose darwinistiese milieu wat geheel en al op toeval en lukrake prosesse vir ontstaan en ontwikkeling van alle lewe steun.

Wat nog te sê die mens met sy unieke superieure eienskappe? Daardie unieke menslike hoedanighede van spiritualiteit, skeppende vermoë, abstraksie is denkpatrone, liefde, moralisering, etiek, altruïsme (selfs in geringer mate by diere) regspleging, vooruitbeplanning, gespesialiseerde lewensvaardighede en -tegnieke, politieke organisasie, ens ens waarvoor die evolusionis in sy darwinistiese (in watter vorm ookal) gewaad, géén empiriese bewys en verklaring kan gee vir hoe dit sou ontstaan uit die darwinistiese evolusionêre proses, nie - daaroor hipoteseer en filosofeer en spekuleer die evolusionis geheel en al as deel van sy ateïstiese religie – darwinisme.

Die opgrawings lewer die getuienis dat mense van die eerste van hulle af, al bedrywig was met spirituele sake soos getuig deur die religieuse artifakte wat oral opgegrawe word – deel van die mens soos die mens self ...

Maar ál die feite soos dit bevind word, harmonieer perfek met die Woord in die opgetekende weergawe daarvan, is vir algar die bewys dat God mense van die begin af só geskape het – hierdie gegewens is al 3,400 en langer gelede, opgeteken. God het die mens uniek geskape met superieure vermoëns en dié vermoëns is nie liggaamlik nie, maar inderdaad juis spiritueel, geestelik, metafisies, van aard – en so sien ons dit by uitstek, selfs en veral vandag, nog.

Groete,
Kobus de Klerk