Die ballerina se naam

  • 1

Foto: Canva.com

Die ballerina se naam

Van kindsbeen af het ek geoefen om op my tone te loop 
En om te balanseer op my ma se trots 
Ek het my hare gekam asof dit silk is wat ek weef 
En my pêrelwit tande, blink geborsel 
My naels was glad en sagpienk 
En ’n glimlag hemelsbreed

Ek wou soos die ballerinas wees 
Wat soos herfsblare in die wind rondswaai 
Wat so sag trap dat hulle op my wimpers sou kon dans 
En slank paradeer op die verhoog

Deesdae sukkel ek om soos die ballerina te wees 
Daar lê klosse silk op my kussingsloop 
My naels het ’n naargeel skynsel 
En my pêrelwit tande word broos van die suur

Maar soms 
Wanneer ek mooi genoeg luister 
Is daar nog steeds ’n ballerina wat agter in my keel dans 
En my roep om haar te kry 
En as ek miskien aanhou probeer 
Sal sy weet ek wil soos sy lyk, al vat dit alles in my

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top